Թուրքիան հույս ունի ավելի մեծ ազդեցություն ունենալ Սիրիայում քաղաքական զարգացումների վրա․ արևելագետ
Աջակցիր «Ա1+»-ինՍիրիան երկու խոշոր տարածաշրջանային կենտրոնների՝ Ռուսաստանի և Թուրքիայի համար դարձել է պայքարի վայր Մերձավոր Արևելքում իրենց դիրքերն ուժեղացնելու համար:
ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանի խոսքով՝ այդ մասին վկայում են վերջին օրերին Սիրիայի Իդլիբ նահանգում տեղի ունեցող զարգացումները, իրավիճակի սրումը:
«Թուրքական զորամիավորումները, Թուրքիայի վերահսկողության տակ գտնվող խմբավորումները, հիմնականում ջիհադիստական ծայրահեղականներն անցել են հարձակման, և վերջին մեկ օրվա ընթացքում դա կարծես նրանց հաջողություն է բերել: Հաղորդումներ կան, որ նրանք մեծ թվով զենք-զինամթերք և զինյալներ են ոչնչացրել Սիրիական բանակից, և ետ է վերցվել մոտ 20 բնակավայր՝ այն տարածքների մի մասը, որոնք ազատագրել էր սիրիական բանակը վերջին օրերին թուրքամետ այդ զինյալներից»,- ասում է Ռուբեն Սաֆրաստյանը։
Նա ընգծում է՝ ռուսական օդուժը վերջին օրերին օժանդակություն չի ցուցաբերում սիրիական բանակին, և այս է պատճառը, որ Թուրքիան, օգտագործելով իր հրետանին և դրոնները, կարողացել է հաջողությունների հասնել։
Ռուբեն Սաֆրաստյանի խոսքով՝ վիճակը քաոսային է, և առաջիկա մի քանի օրերին այն կշարունակվի, մինչև ի հայտ կգան նոր միտումներ։
«Ինչո՞ւ հենց Իդլիբի նահանգում, որովհետև սա վերջին խոշոր տարածաշրջանն է, որը դուրս է Սիրիայի օրինական կառավարության հսկողությունից։ Եվ Թուրքիան իսկապես շահագրգռված է , որ իր հսկողության տակ գտնվող այդ ծայրահեղական, ահաբեկչական խմբավորումների միջոցով պահի այդ տարածաշրջանը իր հսկողության տակ»,- նշում է նա։
Ըստ արևելագետի՝ Թուրքիան հույս ունի մոտ ապագայում ավելի մեծ ազդեցություն ունենալ Սիրիայում քաղաքական զարգացումների վրա։
Ռուբեն Սաֆրաստյանի կարծիքով, մինչ Ռուսաստանի ու Թուրքիայի նախագահների հանդիպումը, որը հավանաբար տեղի կունենա մարտի 5-ին, կողմերը կփորձեն Իդլիբում ինչ-որ գործողությունների գնալ՝ բանակցություններին ավելի ուժեղ դիրքերով ներկայանալու համար:
« Նախանշաններ կան, որ երկու կողմերն էլ պատրաստվում են գնալ որոշակի զիջումների, որովհետև երկուսն էլ ունեն աշխարհաքաղաքական ընդհանուր շահեր»,- նշում է նա։
