Աբրահամը մեկնեց ԱՄՆ
Աջակցիր «Ա1+»-ինՀայազգի պրոֆեսիոնալ բռնցքամարտիկ Արթուր Աբրահամը երեկ մեկնեց ԱՄՆ, որտեղ կշարունակի անմիջականորեն պատրաստվել Անդրե Դիրելի հետ մարտի 6-ին նախատեսված մենամարտին: Այդ մասին տեղեկացնում են գերմանական լրատվամիջոցները:
«Ես անչափ հուզված եմ, որ նորից մեկնում եմ Միացյալ նահանգներ, - մեկնելուց առաջ Բեռլինի օդանավակայանում ասել է Արթուր Աբրահամը, -Եթե դու ցանկանում ես հայտնի բռնցքամարտիկ դառնալ, ապա պետք է հաջողության հասնես օվկիանոսի երկու ափերին: 2008 թ Էդիսոն Միրանդայի նկատմամբ տարած իմ հաղթանակը վկայում է այն մասին, որ իմ մեկնարկն ամերիկյան ռինգում լավ ստացվեց: Կարծում եմ, Սուպերվեցի մրցաշարը ինձ հնարավորություն կտա ավելի շատ մենամարտներ անցկացնել ԱՄՆ-ում»:
Արթուր Աբրահամի հետ Լոս Անջելես է մեկնել նաեւ WBO-ի վարկածով աշխարհի չեմպիոն, ծանրքաշային Մարկո Հուկը, որը պատրաստվում է պաշտպանել իր տիտղոսը մարտի 13-ին նախատեսված մրցամարտում: Պատճառն այն է, որ վերջինիս մարզում է Արթուր Աբրահամի մարզիչը, գերմանացի մասնագետ Ուլի Վեգները:
Ի դեպ, այսօրվանից սկսվել է Արթուր Աբրահամ - Անդրե Դիրել մրցամարտի տոմսերի վաճառքը: Ամենաթանկ տոմսն արժե 180, ամենաէժանը` 85 դոլար:
