Փաշինյանի ամենակարողության միֆն է պայթում ՍԴ պատերին հանդիպելիս. Անդրանիկ Թևանյան (տեսանյութ)
Աջակցիր «Ա1+»-ին«Այն նախաձեռնության մեջ, որն իրականացրել է իշխանությունը կամ կոնկրետ վարչապետը, ես տեսնում եմ չորս ենթատեքստ՝ հոգեբանական, քաղաքական, իրավական և տնտեսական»,- «Սահմանադրական անվտանգություն. մարտահրավերներ և լուծումներ» թեմայով քննարկման ընթացքում հայտարարեց քաղաքագետ Անդրանիկ Թևանյանը:
Ըստ Թևանյանի՝ Նիկոլ Փաշինյանը հայտարարում է, որ Հայաստանում չկա դատավոր, որ իրեն կարող է ասել՝ չէ, սակայն պարզվեց, որ կան այդպիսի դատավորներ, մասնավորապես՝ Սահմանադրական դատարանում.
«Իր ամենակարողության միֆն է պայթում ՍԴ պատերին հանդիպելիս և իր համար հոգեբանկան իմաստով շատ կարևոր է գրավել ՍԴ-ն, որպեսզի ցույց տա, որ ինքը ամենակարող է»:
Ինչ վերաբերում է իրավական շերտին, Թևանյանն ասում է՝ ակնհայտ է, որ մենք գործ ունենք Սահմանդրության երկրորդ գլխում ամրագրված նորմի խախտման հետ.
«Նկատվում է մեկ անձի կամ մի խումբ անձանց կողմից իշխանության յուրացման , սահմանադրական կարգի տապալման փորձ», գտնում է բանախոսը:
Ըստ Թևանյանի՝ խնդիր է դրված մեկ անձի շուրջ բռնապետական ռեժիմ ստեղծելու, իշխանության տարանջատման սկզբունքը վերացնելու.
«Օրենսդիրը գրավված է, գործադիրը գրավված է, և հիմա խնդիր է դրված ամբողջ դատական համակարգը գրավելու»:
Ինչ վերբերում է տնտեսական շերտին, Թևանյանն ասում է.
«Ինչպես հայտնի է, յուրաքանչյուր ոք կարող է դիմել դատարան, երբ սպառված են բոլոր հնարավորությունները: Եթե մենք ուշադրություն ենք դարձնում՝ ինչպիսի օրինագծեր է ներկայացնում այս իշխանությունը, կտեսնենք, որ այս իշխանությունը կապիտալի վերաբաշխման խնդիր է դրել , իսկ ՍԴ-ն կարող է դրան խանգարել»:
Թևանյանի խոսքով՝ իրականում քվեարկության է դրված հետեւյալ հարցը.
«Հարգելի հպարտ կամ նորմալ քաղաքացիներ, արդյոք դուք համաձա՞յն եք, որ Հայաստանում հաստատվի բռնատիրական ռեժիմ, պետք է մերժել այս մոտեցումը»: