Հայաստանի աթլետները 5 մեդալ են նվաճել Թեհրանում կայացած մրցումներում
Աջակցիր «Ա1+»-ինԹեհրանում անցկացվող «Արևածագի 10 օր» անունը կրող միջազգային ավանդական մրցումներում այս տարի Հայաստանից մասնակցել են 10 աթլետ։ Այդ մասին հայտնում է Հայաստանի ազգային օլիմպիական կոմիտեի մամուլի ծառայությունը։
Բոլորից հաջող մրցելույթներ ունեցել է երևանցի Յանա Աբրահամյանը, որը եռացատկում գրավել է 1-ին (12.59 մ), իսկ հեռացատկում ` 2-րդ (5.59 մ) տեղերը: Նույն մրցաձևերում մրցանակային 2-րդ (12.16մ) և 3-րդ (5.39 մ) տեղերն է զբաղեցրել կապանցի Մարիետա Մինասյանը:
Տղամարդկանց հեռացատկում երևանցի Լևոն Ղարիբյանը 7.14մ արդյունքով ճանաչվել է երրորդը:
Հայաստանի աթլետիկայի հավաքականի գլխավոր մարզիչ Միշա Հայրապետյանը հայտնել է, որ ԿԳՄՍ նախարարության համակարգում գործող աթլետիկայի մարզադպրոցում հունվարի 18-ին նախատեսված բաց առաջնության արդյունքներով կձևավորվեն տղամարդկանց և կանանց հավաքականները: Փետրվարին մեր թիմը Ստամբուլում կանցկացնի ուսումնամարզական հավաք, որի ավարտից հետո, փետրվարի 18-ին, կմասնակցի այդտեղ կայանալիք Բալկանյան երկրների ձմեռային բաց առաջնությանը: