Տոնական օրերին գրանցվել է 8146 կանչ․ «Շտապօգնության» տնօրեն (տեսանյութ)
Աջակցիր «Ա1+»-ինԴեկտեմբերի 30-ից մինչև հունվարի 7-ը ներառյալ գրանցվել է «Շտապօգնության» 8146 կանչ, որը 384-ով ավելին է՝ համեմատած անցյալ տարվա նույն ժամանակահատվածի հետ։ 1657 հոգի տեղափոխվել է հիվանդանոց, ասում է «Շտապօգնություն» ՓԲԸ-ի տնօրեն Թագուհի Ստեփանյանը։
«Մանկական կանչերը ևս անցյալ տարվա համեմատ ավելացել են 134-ով»։
Նրա խոսքով պայթուցիկ նյութերի օգտագործման հետեւանքով տուժելու 9 դեպքից 2-ը երեխա են եղել։ 3 հոգի տեղափոխվել է հիվանդանոց՝ 1 երեխա 2 մեծահասակ։
«Երեխան տեղափոխվել է այրվածքաբանական կենտրոն։ Ոգելից խմիչքների չարաշահման պատճառով կանչերի 81 դեպք է գրանցվել, որից 34-ը տեղափոխվել են հիվանդանոց, իսկ սննդային թունավորման երկու դեպք է գրանցվել»։
Թագուհի Ստեփանյանը, անդրադառնալով 2019 թվականին գրանցված կանչերին նշեց, որ այն 14558 կանչով ավել է եղել դրա նախորդ տարվա համեմատ։
2019 թվականին գրանցված կանչերի թվի ավելացումը, Թագուհի Ստեփանյանի կարծիքով, կապված է Շտապօգնության պարկի թարմացման հետ, նման բարձր ցուցանիշ եղել է նաև 2011 թվականին․
«Չեմ կարող է ասել, հնարավոր է դա բնակչության վստահության հարց է, ուզում են մոտիկից ծանոթանալ նոր սարքավորումներին»,- ասաց նա։