Հայաստանը կարող է այլ երկրներին սովորեցնել համախմբվել․ ICANN ընկերության նախագահ
Աջակցիր «Ա1+»-ինICANN ընկերության նախագահ Յորան Մարբին WCIT համաժողովի պանելային քննարկման զեկուցողներից մեկն էր։ Նա Հայաստանում մասնակցեց նաև N 2 համացանցային կառավարման համաժողովին։ «Ա1+»-ի հետ զրույցում նա նշեց՝ առաջին անգամ է Հայաստանում և շատ տպավորված է։
«Ես առաջին անգամ եմ Հայաստանում և վայելում եմ այս ամենը․ ձեր ուտելիքը, հյուրընկալությունը, գինիները: Հրաշալի է։ Ձեր ինտերնետ հանրության հետ մեր հարաբերությունները շատ վաղուց են ձգվում, և նրանք մեզ օգնել են հասկանալ այն, ինչը մենք միշտ ասում ենք՝ ինտերնետն ինչպես գլոբալ է, այնպես էլ՝ լոկալ։ Շատ կարևոր է ուշադրություն դարձնել հատկապես լոկալ հատվածին։ Դուք մեզ դրանում օգնում եք»,- նշեց Մարբինը։
Նա ասում է՝ Հայաստանը տեխնոլոգիական կենտրոն դառնալու ներուժ ունի, քանի որ այստեղ մարդիկ հասկացել են, որ պետք է միասին աշխատեն՝ Կառավարությունը, մասնավոր և գործարար ոլորտները, միջազգային հանրությունը։
«ICANN –ը արդեն աշխատում է ինչպես ձեր նախարարության, հասարակության հետ, այնպես էլ մասնավոր ոլորտի հետ։ Հենց դրանում է կայանում մեր դերը՝ մենք չենք ընտրում մի կողմին ու աշխատում միայն նրա հետ։ Ասեմ նաև, որ 2 տարի առաջ մենք ստորագրել ենք համաձայնագիր։ Այն հիմնականում վերաբերում էր հնարավորությունների ավելացմանը, նախապատրաստական կուրսերին և այլն»։ Ասում է՝ ինքն այստեղ է եկել Հայաստանից սովորելու համար։
«Հայաստանը կարող է այլ երկրներին սովորեցնել համախմբվել, միասին աշխատել թվային տեխնոլոգիաների ոլորտում գիտելիքներն ավելացնելու ուղղությամբ։ Հայաստանը դա ցույց տվեց մասնավորապես այս միջոցառումների ընթացքում»։
Դիջիթեքից և մասնակցող պատանիներից իր ստացած տպավորությունների մասին ասաց․ «Ես ծեր եմ։ Իրականում՝ ես այստեղ եմ, որպեսզի ներկայացնեմ և բացատրեմ ինտերնետի գործունեության մեխանիզմները և որոշ բազային մանրամասներ և տեսնելով նրանց հասկանում եմ, որ ես ավելի շատ բան ունեմ նրանցից սովորելու քան նրանք ինձնից»,- նշեց ընկերության նախագահը։
