Զինծառայողի հարազատները բողոքի ակցիա էին անում ՊՆ-ի դիմաց (տեսանյութ)
Աջակցիր «Ա1+»-ինՄրգաստան գյուղի բնակիչներն այսօր բողոքի ակցիա էին անում Պաշտպանության Նախարարության դիմաց։
Նրանք հավաքվել էին՝ ի պաշտպանություն նույն գյուղի բնակիչ Գարիկ Հակոբյանի, ով պաշտպանության բանակի 7 ամսվա ծառայող է։
Հավաքվածները ներկայացրեցին, որ Գարիկ Հակոբյանին մեղադրանք է առաջադրվել այն բանի համար, որ վերջինս լքել է զորամասը։ Ըստ նրանց՝ զորամասի հրամանատարը զինվորին ծանր հոգեկան վիճակի է հասցրել, և դա է եղել փախուստի պատճառը։
Հակոբյանի հայրը եկել էր՝ պաշտպանության նախարարի հետ հանդիպելու և ներկայացնելու իր ձեռքի տակ եղած փաստերը։
Զինվորի հորը ընդունել է ՊՆ խոսնակ Արծրուն Հովհաննիսյանը, ով լրագրողների հետ զրույցում ասաց, որ պետք է ընթանան իրավական գործընթացներ, եթե ինչ-որ մեկը խոշտանգում է արել, պետք է իրավական կառույցները դրա հիմքերը գտնեն։
«Եթե ունենանք հանցագործության հիմքերը, ապա խոշտանգողը, ինչ աստիճանի կոչումի ու պաշտոնի անձ լինի, պետք է պատասխանատվություն կրի։ Փաստը այս պահին այն է, որ այդ զինվորը այլ զինծառայողի հետ ունեցել է վեճ, որի ժամանակ հասցրել է մարմնական վնասվածք, որով քրեական գործ է հարուցվել։ Զինվորի զորամասից փախուստը այս դեպքերից հետո է եղել»,- նշեց Արծրուն Հովհաննիսյանը։
Զինվորի հայրը լրագրողների հետ զրույցում նշեց, որ որդին առողջական խնդիրներ է ունեցել նախքան ծառայության անցնելը, և դրա համար հատուկ պայմաններում պետք է անցներ ծառայությունը։ Ծառայության ընթացքում որդու մոտ առողջական խնդիրներ են առաջ եկել։
Այս մասով Արծրուն Հովհաննիսյանը ասաց, որ անկախ իրավական հարցերից՝ զինվորի առողջական խնդիրներին իրենք առաջնային տեղ են տալիս, և կլուծեն այդ խնդիրը։
Հավելենք, որ զինվորն այս պահին ռազմական ոստիկանությունում է գտնվում։
Տեսանյութը՝ Factor.am-ի