Քաղավիացիայի կոմիտեն չի որոշում ավիատոմսերի գները. Տաթևիկ Ռևազյան (տեսանյութ)
Աջակցիր «Ա1+»-ինՀՀ քաղավիացիայի կոմիտեի նախագահ Տաթևիկ Ռևազյանը մամուլի ասուլիս էր հրավիրել` ամփոփելու իր պաշտոնավարման մեկ տարին։
Ռևազյանը անհանգստություն հայտնեց, որ կոմիտեի գործառույթի մասին սխալ ընկալում կա, և որ կոմիտեն չի որոշում ավիատոմսերի գները։ Կոմիտեի գործառույթը հիմնականում կայանում է նրանում, որ այն կանոնակարգում է օդային տրանսպորտի համապատասխանեցումը միջազգային ստանդարտներին և ապահովում է թռիչքային անվտանգություն։
Տաթևիկ Ռևազյանը, խոսելով այն մասին, որ մամուլում շատ է խոսվում իր կատարած ճանապարհորդությունների մասին, ասում է, որ դրանք նպաստել են ավիաոլորտում կրթության զարգացմանը.
«Թռիչքային անվտանգությունը բարձր մակարդակով ապահովելու համար շատ կարևոր է կրթությունը: Հաշվի առնելով, որ մենք այն պետությունը չենք, որ կարողանանք աջ ու ձախ փող ծախսենք՝ շատ կարևոր է, որ մենք ուսման համար անվճար տեղեր ունենանք: Իմ ճամփորդությունների արդյունքում ես կարողացել եմ ձեռք բերել նման պայմանավորվածություններ Սինգապուրի, Չինաստանի և ավիացոն այլ դպրոցների հետ տարբեր երկրներում»,-ասաց քաղավիացիայի կոմիտեի նախագահը:
Անդրադարձ եղավ նաև փոքր ավիացիայի զարգացմանը: Կոմիտեի նախագահի խոսքով՝ այն այնքան էլ հրապուրիչ չէ ներդրողների համար: Այդ ոլորտը պետք է զարգացնեն այն մարդիկ, ովքեր իսկապես սիրում են զբաղվել ավիացիոն գործունեությամբ.
«Մեզ տեղեկացրել են, որ Կապանի օդանավակայանը կբացվի այս տարի, բայց մնացած օդանավակայանները շատ վատ վիճակում են»,- հավելեց Տաթևիկ Ռևազյանը:
