Ինչպե՞ս կլուծվի Իջևանի շուկայի դիմացի արգելապատնեշների խնդիրը
Աջակցիր «Ա1+»-ինԱրդեն մի քանի տարի է, ինչ Իջևանի բնակիչները բողոքում են քաղաքի շուկայի դիմաց տեղադրված բետոնե արգելապատնեշների առկայությունից:
Հարցին վերջապես արձագանքել է օրերս իր լիազորությունները ստանձնած Իջեւանի նորընտիր ավագանին:
Խնդրի վերաբերյալ «Ա1+»-ը զրուցել է Իջևանի ավագանու անդամ Թաթուլ Աթաբեկյանի հետ:
Վերջինս նշեց, որ շուկայի մոտ բետոնե արգելապատնեշները տեղադրելուց ի վեր քաղաքացիներից ստացվել են բազմաթիվ բողոքներ։
«Եվ հիմա շուկայի դիմաց երթևեկությունը կարգավորելու համար քննարկվում է 3 տարբերակ։ Որոշումը կայացնելու է նախարարությունը, սակայն հաշվի է առնվելու նաև Իջևանի ավագանու կարծիքը: Նախարարությունն առաջարկում է երեք տարբերակ՝ թողնել այնպես, ինչպես կա, հանել արգելապատնեշները և կատարել գծանշումներ, և հետիոտնի համար տեղադրել լուսացույց, տեղադրել մեկ գծով արգելապատնեշ ճանապարհի կենտրոնով: Մենք հակված ենք երկրորդ տարբերակին»,- ասաց Թաթուլ Աթաբեկյանը:
Նա տեղեկացրեց, որ իրենց կարծիքը ներկայացրել են օրերս կայացած ավագանու անդրանիկ նիստի ժամանակ, սակայն վերջնական որոշում կայացնողը տրանսպորտի և կապի նախարարությունն է:
«Մեր կարծիքը առավել հիմնավորելու համար ես մինչև հարցի քննարկումը որոշակի հարցումներ էի անցկացրել ժողովրդի շրջանում, թե՛ սոցցանցերի միջոցով, թե՛ կենդանի շփումներով, և հարցվածների 80 տոկոսը հենց մեր առաջարկած տարբերակն է ուզում՝ հանել արգելապատնեշները և կատարել գծանշումներ, ինչպես նաև հետիոտնի համար տեղադրել լուսացույց: Ինձ համար իմ կարծիքը ներկայացնելիս շատ կարևոր է իմանալ իջևանցիների կարծիքը այս հարցի վերաբերյալ», ասաց Թաթուլ Աթաբեկյանը:
Քանի որ ավագանին դեռ նոր է անցել իր լիազորություններին, Թաթուլ Աթաբեկյանն ասաց, որ Իջևանի խնդիրներին քաջատեղյակ են, և իրենց նոր ձևավորված երիտասարդ կազմով տրամադրված են աշխատանքի:
