Գագիկ Ծառուկյանը կրկին չի ներկայացել հարցաքննության
Աջակցիր «Ա1+»-ին«Բարգավաճ Հայաստան» խմբակցության ղեկավար Գագիկ Ծառուկյանը հունիսի 18-ին չի ներկայացել Քննչական կոմիտե՝ հարցաքննության։ Այս մասին «Ա1+»-ին հայտնեց ՔԿ մամուլի խոսնակ Նաիրա Հարությունյանը։
Նշենք, որ այսօր Ազգային ժողովում լրագրողների հետ զրույցում Գագիկ Ծառուկյանը հայտարարել էր, որ ծանուցագիրը ստացել է, սակայն չի ներկայանալու Քննչական կոմիտե։
«Դրա կարիքը չկա»,- ասել էր նա։
Ինչպես հայտնի է, Քնչական կոմիտեն հունիսի 15-ին երկրորդ անգամ ծանուցագիր էր ուղարկել ԲՀԿ ղեկավարին, հրավիրելով նրան հարցաքննության՝ Աբովյանում քաղաքապետի ընտրության նախօրեին «Քաղաքացիական պայմանագրի» թեկնածուի նախընտրական շտաբի պետի տան և մեքենայի հրկիզման գործով:
Քննչական կոմիտեն առաջին անգամ Գագիկ Ծառուկյանին հարցաքննության էր հրավիրել հունիսի 11-ին, սակայն, Գագիկ Ծառուկյանը ծանուցագիրն առձեռն ստանալուց հետո պատռել էր այն և չէր ներկայացել ՔԿ։