Ինչ պայման է դրել ԲԴԽ անդամի թեկնածուն «Իմ քայլը» խմբակցության առաջ
Աջակցիր «Ա1+»-ինԲարձրագույն դատական խորհրդի անդամի թեկնածու Գրիգոր Բեքմեզյանի հետ «Իմ քայլը» խմբակցության հանդիպումը ավարտվել է: Լրագրողների հետ զրույցում Գրիգոր Բեքմեզյանը նշեց, որ հանդիպումն արդյունավետ է անցել:
Հանդիպմանը քննարկվել են դատական համակարգի բարեփոխումների վերաբերյալ հարցեր:
Բարձրագույն դատական խորհուրդի անդամների հրաժարականները Գրիգոր Բեքմեզյանը պայմանավորում է նրանով, որ այդ մարմինը լավ չի աշխատել:
«Եթե իրենք հասկանային, որ արդյունավետ են աշխատել, չէր լինի հրաժարականների այս շարանը: Բացի այդ՝ չէր լինի դատարանների և ԲԴԽ միջև կոնֆլիկտը»,- ասաց նա:
Գրիգոր Բեքմեզյանը մեծամասնություն կազմող «Իմ քայլը» խմբակցության առաջ պայման է դրել, որ ԲԴԽ չի գնում որպես «Իմ քայլը» խմբակցության ներկայացուցիչ, գնում է որպես ԱԺ-ից ընտրված անդամ:
«Ինձ պետք է, որ Ազգային ժողովն աջակցի ինձ, որովհետև ես այնտեղ գնում եմ իրականացնելու ԲԴԽ անդամի լիազորությունները, որը պետք է լինի անկախ: Այն հանգամանքը, որ իշխանությունները չեն ազդում դատական համակարգի վրա, ինձ հույս է տալիս հավատալու, որ հետագայում, եթե նշանակվեմ ԲԴԽ անդամ, իշխանությունները չեն փորձելու իմ վրա ազդել ինչ-ինչ որոշումների կայացման ժամանակ»,- նշեց նա՝ հավելելով.
«Եթե փորձ արվի իմ վրա ճնշում գործադրելու, ես առաջինն եմ դա ասելու։Ես թույլ չեմ տա, որպեսզի իմ հեղինակությունը ինչ-որ կերպ նսեմացվի»,- ասաց նա:
