Մարգարիտա Գրիգորյանը կշարունակի պաշտոնավարել Հ1-ի գործադիր տնօրենի պաշտոնում. Արա Շիրինյան (տեսանյութ)
Աջակցիր «Ա1+»-ինՄարգարիտա Գրիգորյանը շարունակելու է պաշտոնավարել հանրային հեռուստաընկերության գործադիր տնօրենի պաշտոնում: Այս մասին Ազգային ժողովում լրագրողների հետ զրույցում հայտարարեց Հանրային հեռուստառադիոընկերության խորհրդի նորընտիր նախագահ Արա Շիրինյանը:
Նա զերծ մնաց մեկնաբանել Մարգարիտա Գրիգորյանի սեփական կադրային բանկ ունենալու մասին հարցը: Ինքն անձամբ կուսումնասիրի և հետևություններ կանի:
«Առայժմ ես նպատակահարմար չեմ գտնում որևէ հրապարակային բան հայտնել։ Չեմ կարծում, թե նախկինում հնչած բոլոր մեղադրանքներն ունեին լուրջ հիմքեր»,- հավելեց Շիրինյանը:
Հանրային հեռուստառադիոընկերության խորհրդի նորընտիր նախագահը պնդեց՝ Հանրային հեռուստաընկերությունը պիտի ծառայի հանրության շահերին և միևնույն ժամանակ հավաստիացրեց՝ ամեն ինչ անելու է այդ նպատակին հասնելու համար: Այնուամենայնիվ կարծում է Հ1-ը դեռ չի արտացոլում հանրությանը:
«Չեմ կարծում, թե սա շատ արագ գործընթաց է: Փոփոխությունները պիտի տեղի ունենան նաև մարդկանց մեջ: Համակարգային խնդիրներ կան, որոնք վաղուց արմատավորված են, դրանք փոխարինելու համար որոշակի ժամանակ է անհրաժեշտ»,- ընդգծեց Արա Շիրինյանը:
Մանրամասները՝ տեսանյութում:
