«Գնալու եմ Նոստրադամուսի մոտ ...»
Աջակցիր «Ա1+»-ինԱրարատ գյուղի դաշտերի մի մասը ոռոգվում է կոյուղաջրերով: Ներկայումս կոյուղագիծը անմիխիթար վիճակում է. 2-3 կմ երկարությամբ կոյուղագծի տարբեր հատվածներում բացակայում են խողովակները: Այս խնդիրը տարիների պատմություն ունի:
Գյուղացիները նշում են, որ գյուղատնտեսական կուլտուրանների մշակության համար օգտագործվող կոյուղու ջրերը թունավորում են հազարավոր մարդկանց: Գյուղացիներից մեկը,որը չցանկացավ ներկայանալ, ասաց, որ իր բոստանի բանջարեղենը վաճառում է անծանոթներին, իսկ ինքը ապահովության համար գնում է ուրիշ գյուղի բանջարեղենը:
«2 հեկտար հող եմ մշակում, աճեցնում եմ լոլիկ, սմբուկ: Հիմա հողս պետք է կամ չջրեմ, կամ կեղտաջրով ջրեմ, ինչի արդյունքում էլ բերքս չի վաճառվում. շուկայում մարդիկ հենց իմանում են, որ այս գյուղի բանջարեղենն է, չեն գնում»,-մեզ հետ զրույցում ասաց հողագործ Րաֆֆի Հովաննիսյանը:
Արարատի գյուղապետ Գրիշ Մելքոնյանի հավաստմամբ, շատ դեպքերում էլ գյուղացիները միտումնավոր են նախընտրում կոյուղաջուրը, որ ջրի հարկ չվճարեն:
Արարատի Ջրօգտագործողներ ընկերության տնօրեն Խաչիկ Հարությունյանի հավաստմամբ, իրենք դիմել են ՀՀ առողջապահության նախարարության պետական համաճարակային տեսչության Արարատի մարզային կենտրոնի պետին, նաեւ' ՀՀ Արարատի մարզի «Հայջրմուղկոյուղի» ՓԲԸ «Կենտրոն- Արեւմտյան» տարածքային մասնաճյուղի տնօրենին, բայց մինչ օրս անպատասխան են մնացել:
«Գրավոր դիմումներով տարբեր ժամանակներում դիմել ենք Արարատի մարզպետներ ե'ւ Հովիկ Աբրահամյանին, ե'ւ Ալիկ Սարգսյանին, Վեդի քաղաքի սանէպիդկայանին, ինչպես նաեւ «Ջրային տնտեսության պետական կոմիտեի» նախագահին: Ոչ ոք ոչնչով չի կարողացել կամ չի ցանկացել օգնել: Գործող մարզպետին էլ դեռ չենք դիմել»,-ասաց գյուղապետ Գրիշ Մելքոնյանը:
«Ա1+»-ի հարցին, թե մոտ ապագայում խնդրի լուծման համար գյուղապետ Գրիշ Մելքոնյանը ի՞նչ քայլեր է մտադիր ձեռնարկել, պատասխանեց. «Մտադիր եմ գնալ Նոստրադամուսի մոտ, ինչ ասի, էն էլ կանեմ»:
Հիշեցնենք, որ գյուղին հասցված վնասները' թալանված խողովակներն ու չվաճառված մթերքը, արդեն հասնում են մի քանի միլիոնի:
