«Երբ կթում ենք ձեռքով,  չենք կարող ունենալ սանիտարապես մաքուր կաթ» (տեսանյութ)

2019-2024 թվականներին պետությունը նախատեսել է պետական աջակցություն ցուցաբերել  տավարաբուծության զարգացման  և «խելացի անասնաշենքերի» կառուցման համար։ ՝ Ֆիզիկական և իրավաբանական անձանց փոխհատուցվի 35 մլն դրամ. այս մասին հայտնում է ՀՀ գյուղատնտեսության նախարարի տեղակալ Տիգրան Գաբրիելյանը։

Անասնաշենքերի կառուման համար հետաքրքրվողները շուրջ 300-ն են, որից 100-ը արդեն ներկայացրել է դիմում։

Այս ծրագրի համար ֆինանսական աջակցություն կցուցաբերեն 5 բանկեր և  6 վարկային կազմակերպություն։

Անասնաբուծության ևանասնաբուժության վարչության պետ Լևոն Տեր- Իսահակյանի խոսքով ծրագրերը նպատակաուղղված է ոլորտը ավելի ինտենսիվացնելու և արտադրանքի արդյունավետությունը բարձրացնելու համար։

Խելացի անասնաշենքեր կառուցելու համար պետությունը սահմանել է 3 մոդել՝ նախատեսված տարածքները պետք է լինեն նվազագույնը 10-15 ,միջինը ՝ 20-25 և առավելագույնը 45 գլուխ խոշոր եղջերավոր անասունների համար։Առավելագույն 45 գլուխ անասունի համար պետք է հատկացնել 451քմ տարածք։ Տարածքների կառուցման համար պետությունը գումարը կհատկացնի անասնաշենքերի կառուցումից հետո։

 «Փոխհատուցումը իրականացվելու է երկու փուլով։ Առաջին փուլը կտրամադրվի մինչև մեկ տարվա ընթացքում անասնաշենքի կառուցումից հետո իսկ մյուս մասը կտրամադրվի, որպեսզի անասնաշենքը համալրվի տեխնիկական միջոցներով».ասաց Լևոն Տեր- Իսահակյանը։

Տիգրան Գաբրիելյանը նշեց, որ նոր անասնաշենքերը տարբերվելու են ավանդական պահվածքով անասնաշենքերից։ Խելացի անասնաշենքերում  կենդանիները կապված չեն լինի, կարող են շրջել,  ջուր խմել,  և ապահովված կլինեն մշտական ջրով և օդափոխանակությամբ, ինչն  էլ կնպաստի կենդանիների  մաքսիմալ մթերատվությանը։

«Ինչքան էլ կենդանուն պահենք մաքուր պայմաններում, սակայն երբ կթում ենք ձեռքով, չենք կարող ունենալ սանիտարապես մաքուր կաթ»,-նշեց Տիգրան Գաբրիելյանը։

Նախարարի տեղակալը նաև ավելացրեց, որ  անասնատերերի և ֆերմերների համար նախատեսվում է ուսուցողական ծրագրեր։