Փոքրիկ թարախիկներ, միկրոբներ, ինֆեկցիաներ են լինում, բոլորը դրա մասին իմանում են. Դավիթ Տոնոյան (տեսանյութ)
Աջակցիր «Ա1+»-ինՍահմանապահ զորքերի օրվան նվիրված միջոցառմանը մասնակցում էր նաև Պաշտպանության նախարար Դավիթ Տոնոյանը: Լրագրողները նախարարից հետաքրքրվեցին, արդյո՞ք իրականությանը համապատասխանում է այն տեղեկությունը, թե 2019 թվականի հունվարին Մարտակերտի N զորամաս զորակոչված զինծառայողը ենթարկվել է սեքսուալ բնույթի բռնի գործողությունների և ծեծի: Դավիթ Տոնոյանը հստակ պատասխան չտվեց:
«Զինված ուժերը առողջ օրգանիզմ է, երբ որ փոքրիկ թարախիկներ, միկրոբներ, ինֆեկցիաներ են լինում, բոլորը դրա մասին իմանում են: Լինում են այդպիսի բաներ, ինչպես հասարակության մեջ, այնպես էլ զինված ուժերում, բայց զինված ուժերում ավելի քիչ»,- նշեց նախարարը:
Ի դեպ, նախարարից հետաքրքրվեցին նաև, թե նորմալ է, երբ Պաշտպանության նախարարն ունի երկու քաղաքացիություն, նկատի ունենալով նախկին նախարար Միքայել Հարությունյանին, որը Մարտի 1-ի գործով մեղադրվում է այլ անձանց հետ նախնական համաձայնությամբ սահմանադրական կարգը տապալելու համար:
«Ես անձամբ նորմալ չեմ համարում, բայց օրենքով կարող է լինել»,- ընդգծեց Դավիթ Տոնոյանը:
Միքայել Հարությունյանը ունի նաեւ ՌԴ քաղաքացիություն։
