«Սպայկա» ընկերության աշխատակիցները կառավարության շենքի դիմաց են։ Ընկերության զարգացման գծով փոխտնօրեն Կարեն Բաղդասարյանն ասաց, որ իրենց ակցիան քաղաքական ենթատեքստ չունի, պարզապես իրենք վրդովված են։ «Սա երկրաշարժ է տնտեսության համար, ինչ է, պետք է ամեն ինչ բառացի ասե՞նք, պարոն ՊԵԿ»։ «Սպայկա» ընկերության աշխատակիցները պահանջում են հանդիպում վարչապետ Նիկոլ Փաշինյանի հետ։ Աշխատակիցներն ասում են, որ ընտրությունների ժամանակ իրենց ձայնը տվել են Նիկոլ Փաշինյանին, մինչեւ վերջ իր կողքին են եղել եւ հիմա էլ հանդիպում են պահանջում։ Ընդորում՝  միայն վարչապետի հետ, նրա օգնականների, այլ աշխատակիցների հետ չեն ցանկանում հանդիպել, նրանց ասելու բան չունեն։ Կարեն Բաղդասարյանի խոսքով՝ Սպայկա ընկերության հարցը միայն կարող է Նիկոլ Փաշինյանը լուծել։ Կարեն Բաղդասարյանը հերքեց այն լուրերը, թե «Սպայկա» ընկերությունը պատկանում է այս կամ այն մարդուն։ Կարեն Բաղդասարյանն ասաց, որ «Սպայկայի»  միակ սեփականատերը Դավիթ Ղազարյանն է։ Այս պահին ցուցարարներին է մոտեցել վարչապետ  Նիկոլ Փաշինյանի օգնականն Նաիրի Սարգսյանը։ Կարեն Բաղդասարյանն Նաիրի Սարգսյանին ասաց, որ վարչապետի անձնական երաշխիքն են ուզում Դավիթ Ղազարյանի ազատ արձակման համար։ Վարչապետի օգնականն էլ նկատել տվեց, որ  դա միջամտություն կլինի արդարադատությանը։