Անկայուն առաջնություն
Աջակցիր «Ա1+»-ինՀՀ ֆուտբոլի առաջնության բարձրագույն խմբի մրցաշարն որքան մոտենում է եզրագծին, այնքան անկանխատեսելի են դառնում հանդիպումների արդյունքները:
Անակնկալ խաղով առաջին հերթին առանձնանում է մրցաշարի առաջատար «Փյունիկը»: Վերջինս 18-րդ տուրում 0:1 հաշվով անսպասելի պարտվեց առաջնության ընդգծված ետնապահ «Արարատին», իսկ ահա հերթական խաղում փյունիկցիները Կապանում հեշտությամբ հաղթեցին մրցանակային 3-րդ տեղին հավակնող «Գանձասարին»' 2:0:
Նույնպիսի անկայուն խաղ է ցուցադրում ոսկե մեդալի մյուս հավակնորդ «Միկան»: 19-րդ տուրում միկացիները վստահ առավելության հասան երրորդ տեղում ընթացող «Ուլիսի» նկատմամբ'2:0, իսկ ահա նախորդ խաղում 1:2 հաշվով պարտվել էին կադրային խնդիրներ ունեցող «Բանանցին» (որակազրկման պատճառով վերջինիս կազմում բացակայում էին առաջատար երկու ֆուտբոլիստներ' թիմի ավագ Արթուր Ոսկանյանը եւ հենակետային կիսապաշտպան Կասուլեն):
Նույնը կարելի է ասել նաեւ մեր երբեմնի դրոշակակիր «Արարատի» մասին, որը, կարելի է ասել, դարձել է հանրապետության չեմպիոն «Փյունիկի» սարսափը, քանի որ վերջինիս հետ անցկացրած վերջին երկու հանդիպումներում վաստակել է 4 միավոր եւ բաց չի թողել ոչ մի գոլ:
Սակայն հաջողված խաղերին հաջորդում են լուրջ սայթաքումներ, ինչպես տեղի ունեցավ «Միկայի» հետ արտագնա հանդիպման ժամանակ, երբ «Արարատը» հիմնականում պաշտպանների եւ դարպասապահների կողմից թույլ տված սխալների հետեւանքով խոշոր' 1:5 հաշվով պարտություն կրեց:
Ընդհանուր առմամբ առաջնության բոլոր մասնակիցնրն էլ շատ անկայուն են հանդես գալիս այս տարի, ինչը վկայում է այն մասին, որ մեր թիմերը չեն կարողանում պահպանել լավ մարզավիճակ ողջ մրցաշրջանում, այդ իսկ պատճառով վերելքներին հաջորդում են վայէջքները, եւ հակառակը:
19-րդ տուր
Բանանց - Արարատ' 0:0
Գանձասար - Փյունիկ' 0:2
Միկա - Ուլիս' 2:0
Շիրակ - Կիլիկիա' 1:1
Մրցաշարային աղյուսակ
Խ Հ Ո Պ Գ Մ
1. Փյունիկ 19 13 5 1 35-8 44
2. Միկա 19 13 2 4 42-20 41
3. Ուլիս 19 11 3 5 30-14 36
4. Բանանց 19 10 2 7 27-19 32
5. Գանձասար 19 8 2 9 15-26 26
6. Շիրակ 19 3 7 9 16-37 16
7. Կիլիկիա 19 3 3 13 14-30 12
8. Արարատ 19 1 4 14 8-33 7
