«ԹՈՂ ՀԱՋՈՂՈւԹՅՈւՆՆԵՐԸ ԲԱԶՄԱՊԱՏԿՎԵՆ»
Աջակցիր «Ա1+»-ինՇնորհավորում եւ բարեմաղթում են ֆուտբոլային աշխարհի ճանաչված ներկայացուցիչները
Լեւոն Պաչաջյան (Հայաստանի 2007թ. լավագույն ֆուտբոլիստ)
Թող այս տարի հայկական ֆուտբոլում արձանագրված հաջողությունները հաջորդ տարի եռապատկվեն, բազմապատկվեն: Ակումբներին հաջողություն կմաղթեն եվրագավաթների խաղարկությունում: Թող լավ արդյունքների հասնեն եւ որքան հնարավոր է առաջ շարժվեն: Ֆուտբոլիստներին ցանկանում են հաջող մրցաշրջան, որում նրանք զերծ կմնան վնասվածքներից` միշտ կազմ ու պատրաստ լինելով բոլոր հանդիպումներին: Երկրպագուներին էլ թող ավելի շատ հաճախեն մարզադաշտ եւ քաջալերեն մեզ հաջողության հասնելու համար:
Աշոտ Մանուկյան (ՀՖՖ փոխնախագահ)
Շնորհավորում եմ մեր ֆուտբոլիստների, մարզիչների եւ հայկական ֆուտբոլին առնչություն ունեցող անձանց ամանորը: Թող բոլոր թիմերը բարելավեն իրենց խաղամակարդ եւ լավ արդյունքների հասնեն, քանի որ նրանց հաջող ելույթներից կախված նաեւ հավաքական ունենալը: Մեր հավաքականին հաջողություն մաղթենք ընտրական այդ ուժեղ խմբում, որ կարողանա պատվով դուրս գալ: Տեսնենք, թե ինչպես կլուծվի մարզչի հարցը, որից հետո հնարավոր կլինի սկսկել նախապատրաստական աշխատանքները:
Արարատ Ճաղարյան (Հայաստանի 2007թ. լավագույն մրցավար)
Թող գալիք տարում միայն հաղթանակները ուղեկցեն մեր ֆուտբոլիստներին եւ ֆուտբոլային աշխարհի ներկայացուցիչներին: Ցանկանում եմ նրանց հաջողություն թե ֆուտբոլային խաղադաշտերում, թե անձնական կյանքում:
Արթուր Ոսկանյան (Հայաստանի հավաքականի եւ «Արարատի» ֆուտբոլիստ)
Նախ բոլորին մաղթում եմ տոնական տրամադրություն եւ հուսով եմ մեր ողջ ազգը բարձր տրամադրությամբ կդիմավորի ամանորը: Ինչպես տարին սկսես, այնպես էլ կշարունակես եւ համոզված եմ, որ այդպիսի լավ տրամադրությունը բոլորիս կուղեկցի 2008թ.: Հուսով եմ, որ տարին հաջող կընթանա նաեւ հայկական ֆուտբոլի համար: Դրա համար կան բոլոր հիմքերը:
Ռուբեն Նազարեթյան (Ֆուտզալի հավաքականի գլխավոր մարզիչ)
Շնորհավորելով մեր ֆուտբոլային հասարակության ամանորը եւ սուրբ ծնունդը` ցանկանում եմ նորանոր հաջողություններ 2008թվականին: Անցող տարին լի էր ֆուտբոլային իրադարձություններով եւ որոշակի հաջողություններ գրանցվեցին: Հույս ունենանք, որ այդ հաջողություններով չենք սահմանափակվի եւ նոր տարում կունենանք ավելի բարձր արդյունքներ: 2008 թվականում իրադարձությունների քանակը եւս բավական շատ է եւ հաջողություն մաղթենք մեր ֆուտբոլիստներին բոլոր կարեւորագույն հանդիպումներում հաջող հանդես գալու համար:
Վարդան Մինասյան (Հայաստանի հավաքականի գլխավոր մարզիչ պաշտոնակատար)
-Շնորհավորում եմ մեր ողջ ազգի ամանորը եւ ցանկանում եմ ամենայն բարիք: Թող 2008 թվականը լինի հաջողությունների տարի հայկական ֆուտբոլի համար:
Ռոբերտ Արզումանյան (Հայաստանի հավաքականի 2007թ. ամենարդյունավետ ֆուտբոլիստ)
Շնորհավորում եմ մեր ազգի Ամանորը եւ Սուրբ ծնունդը` ցանկանալով նրանց առողջություն: Մեր ֆուտբոլասերներին էլ համբերություն եմ ցանկանում հաջորդ տարի կայանալիք հանդիպումներում:
Գեւորգ Ղազարյան (Մրցաշրջան 2007-ի հայտնություն)
Հաջողություն եմ մաղթում մեր ֆուտբոլային աշխարհին: Թող հաջորդ տարի նույն ոգով ավելի լավ արդյունքներ գրանցվեն: Հայաստանի առաջնությունը ավելի դիտարժան պայքարում անցնի եւ այս տարի եղած լարվածությունը, սուր մրցակցությունը ավելի մեծանա հաջորդ տարում: Ամենակարեւորը հաջողություն եմ մաղթում մեր ազգային հավաքականին եւ հուսով եմ ընտրական փուլում մեր թիմը լավ ելույթներ կունենա:
