A
A
Լարված իրավիճակ Օպերայի հարակից տարածքում. սրճարանները ապամոնտաժում են (տեսանյութ)
Կեսօրից Երևանի Կենտրոն վարչական շրջանի աշխատակիցները փորձում էին ապամոնտաժել Օպերային հարակից սրճարանները: «Ջազվե» սրճարաննների հիմնադիր Արմեն Պետրոսյանի համար քաղաքապետարանի կողմից ծանուցումը անակնկալ է եղել իրենց համար: Շեշտում է տարիներ շարունակ աշխատել են բարեխղճորեն, հարկերից չեն խուսափել: Ըստ Արմեն Պետրոսյանի՝ «Ջազվե»-ն 2004 թվականից է գործում Օպերայում, պայմանագիրը մինչև 2028 թ. է: Ընդունելի կլիներ, եթե քաղաքապետը փորձեր հանդիպել սրճարանատերերի հետ:
«Մեր համար ընդունելի կլիներ, որ քաղաքապետը նորմալ քաղաքապետի դիրքում լիներ և բացատրեր, որ կանաչապատման գործընթաց են սկսել, քանդած տարածքներ կան քաղաքում, մի օր գալու ենք հասնենք այս տարածքին, ձեր բիզնես պլանները այնպես կազմեք, որ մինչև 2028թ. կարող է հնարավոր չլինի պայմանագիրը պահել»:
Երևանի ավագանու «Լույս» խմբակցության անդամ Անի Խաչատրյանը դեմ չէ, որպեսզի սրճարանները ապամոնտաժեն, բայց կարծում է, որ քաղաքապետարանը խտրականություն է դնում սրճարանների միջև:
«Օպերայի հարակից տարածքն ունի հստակ պարիսպներ, որից ներս, եթե քանդվում է, պետք է քանդեն բոլորը և չպետք է լինի կողմնապահություն: 2-3 սրճարան են քանդում, ինչո՞ւ օրինակ չեն քանդում Սամվել Ալեքսանյանի սրճարանը և մյուսներինը»:
Սրճարանատերերը նշում էին, որ իրենց չեն իրազեկել, որ այսօր սրճարանները ապամոնտաժելու են, սրան հակառակ, քաղաքապետարանից Արամ Մարտիրոսյանը շեշտեց, որ դեռ փետրվարի 15-ին են ծանուցվել նրանք, որ պետք է սրճարաններն իրենք ապամոնտաժեն, բայց չեն արել: Ի դեպ, ըստ քաղաքապետարանի ներկայացուցչի՝ իրենք կարող էին նաև չծանուցել, որովհետև այդ տարածքները համարվում են համայնքային սեփականություն:
«Մենք որպես լրացուցիչ միջոց ծանուցել ենք, օրենքով նման պարտավորություն չունենք, քանի որ այն համարվում է համայնքային սեփականություն, որևէ իրավունք ընկերությունը այդ տարածքի նկատմամբ չունի»:
Կենտրոն վարչական շրջանի աշխատակիցները փորձեցին սկսել ապամոնտաժումը, բայց սրճարանատերերը, աշխատակիցները և քաղաքացիները դիմադրեցին: Ակցիայի մասնակիցները պահանջեցին, որպեսզի քաղաքապետ Հայկ Մարությանը գա: Նրանք անընդմեջ վանկարկում էին՝ քաղաքապետ, քաղաքապետ, քաղաքապետ: Երկար վիճելուց հետո, սրճարանատերերը, Կենտրոն վարչական շրջանի ղեկավար Վիկտոր Մնացականյանը և «Լույս» խմբակցության անդամ Անի Խաչատրյանը որոշեցին, որ այսօր սրճարանների ամպամոնտաժում չի լինի, շահառու կողմերը այսօր հանդիպում կունենան քաղաքապետի հետ: Վիկտոր Մնացականյանը հավելեց.
«Փորձենք լսել, իրենք էլ են մեր քաղաքացիները, մեր տնտեսվարողները, բայց մենք պետք է բացատրենք, որ չի կարող լինել Երևանի կանաչ տարածքների հաշվին»: