Մի խումբ հասարակական, քաղաքական գործիչներ, Ազգային ինքնորոշում միավորման անդամներ, «Հայաստանի եվրոպական» կուսակցության անդամներ Երևանի Անգլիական այգում հարգանքի տուրք մատուցեցին Փետրվարյան ապստամբության օրերին նահատակված ապստամբների  հիշատակին։ Կինոռեժիսոր, Հայաստանի եվրոպական կուսակցության անդամ, հասարակական-քաղաքական գործիչ  Տիգրան Խզմալյանի համար այս օրը Հայաստանի նորագույն պատմության կարևորագույն օրերից մեկն է: «1921 թվականին այս օրը ապստամբած ժողովուրդը ազատագրել էր Երևանը բոլշևիկյան սովետական իշխանությունից: Ամբողջ 50 օր արդեն սովետականացված Հայաստանը փաստորեն նորից անկախացավ, վերականգնվեց մեր անկախ պետականությունը»,- նշում է Խզմալյանը:  Դա միակ դեպքն է խորհրդային տարածքում, խորհրդային ժամանակաշրջանում, ըստ Խզմալյանի, ոչ մի այլ ազգ, ոչ մի այլ երկիր չէր հանդգնել ապստամբելու և չի հաղթահարել բոլշևիկյան իշխանությունը: Ըստ կինոռեժիսորի՝  Փետրվարյան ապստամբությունը ոչ միայն Հայ հեղափոխական դաշնակցության, այլև՝ հայ ժողովրդի ընվզման դրսևորումն էր։ Ելույթով հանդես եկավ նաև ԱԻՄ առաջնորդ Պարույր Հայրիկյանը: Հայրիկյանը շեշտում է, որ փետրվարի 18-ն ունեցավ պատմական մեծ նշանակություն, քանի որ եթե չլիներ փետրվարյան ապստամբությունը, չէր լինի 1980-ական թվականների անկախության շարժումը: «1921 թվականը կայացավ ի հեճուկս իշխանությունը բոլշևիկներին հանձնած  դաշնակցական ղեկավարության»,- ընդգծեց նա: