Եվրանեսթ ԽՎ-ում ՀՀ պատվիրակությունը կգլխավորի Մխիթար Հայրապետյանը
Այսօր Ազգային ժողովի Խորհրդի նիստում ձևավորվեց Արևելյան գործընկերության խորհրդարանական վեհաժողովում (Եվրանեսթ) Ազգային ժողովի յոթերորդ գումարման պատվիրակության կազմը: Այն կգլխավորի «Իմ քայլը» խմբակցության պատգամավոր, Ազգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովի նախագահ Մխիթար Հայրապետյանը: Մխիթար Հայրապետյանը, կարևորելով միջազգային տարբեր հարթակներում խորհրդարանական դիվանագիտության դերը, ընդգծել է. «Հպարտությամբ պետք է նշեմ, որ գլխավորելու եմ այս պատասխանատու առաքելություն իրականացնող պատվիրակությունը: Վստահ եմ, որ կուսակցական ընկերներիս և «Բարգավաճ Հայաստան» ու «Լուսավոր Հայաստան» կուսակցությունները ներկայացնող իմ գործընկերների հետ մեզ կհաջողվի պատվով ներկայացնել Հայաստանի Հանրապետությունը միջազգային այս հարթակում»: Եվրանեսթ խորհրդարանական վեհաժողովում ՀՀ պատվիրակության կազմում են նաև Արման Եղոյանը, Միքայել Զոլյանը, Հերիքնազ Տիգրանյանը, Էդգար Առաքելյանը, Կորյուն Մկրտչյանը, Գայանե Աբրահամյանը, Վահե Էնֆիաջյանը, Նորա Առուստամյանը և Տարոն Սիմոնյանը: Եվրանեսթ Խորհրդարանական Վեհաժողովը Եվրոպական Միության եւ Արեւելյան հարեւանների միջեւ քաղաքական ասոցացումը նպաստելու ու տնտեսական ինտեգրումը խորացնելու նպատակով ստեղծված խորհրդարանական հարթակ է: Որպես պառլամենտական խորհրդատվության, վերահսկողության եւ մոնիտորինգի գծով պատասխանատու կառույց՝ Եվրանեսթը նպաստում է Արեւելյան գործընկերության ամրապնդմանը եւ զարգացմանը:
