Մունդիալ-2018. Բելգիայի հավաքականը հաղթեց նաեւ Անգլիայի թիմին (տեսանյութ)
Ռուսաստանում ընթացող ֆուտբոլի աշխարհի առաջնությունում ավարտվեց խմբային փուլը: Վերջինը հարաբերությունները պարզեցին G խմբի թիմերը, որոնք վաղուց որոշել էին երկու հաջողակներին ու երկու անհաջողակներին: Մնում էր միայն պարզել, թե դրանք ինչ տեղեր են զբաղեցնելու 3-րդ տուրից հետո: Եւ ահա, Բելգիայի հավաքականը 1:0 նվազագույն հաշվով հաղթելով Անգլիայի ընտրանուն, վաստակեց 9 միավոր եւ զբաղեցրեց 1-ին տեղը: 1/8 եզրափակիչում բելգիացիները կհանդիպեն Ճապոնիայի հավաքականի հետ: Անգլիայի ընտրանին 6 միավորով գրավեց 2-րդ տեղը եւ նույնպես մտավ փլեյ-օֆֆ, որտեղ նրան սպասում է Կոլումբիայի ընտրանին: Խմբի հետնապահների խաղում Թունիսի ընտրանին 2:1 հաշվով հաղթեց Պանամային ընտրանուն եւ ի վերջո զբաղեցրեց 3-րդ տեղը: Այժմ առաջնությունում մեկօրյա ընդմիջում է հայտարարված, իսկ հունիսի 30-ից սկսվելու է փլեյ-օֆֆը, որտեղ արդեն պարտվող թիմերը միանգամից կլքեն առաջնությունը:
