ՀԺԱՄ. Նոր կառավարության ծրագիրը տարակուսանք է առաջացնում
«Հայաստանի ժողովրդավարական ազատական միություն» կուսակցության վարչության հայտարարությունը
ՀԺԱՄ կուսակցությունը, դրական գնահատելով ապրիլ-մայիս ամիսներին Հայաստանում տեղի ունեցած հեղափոխությունը, իր աջակցությունն է հայտում երկրի հզորացմանը միտված նոր ծրագրերին:
Արձանագրում ենք, որ սույն հեղափոխության նախաձեռնողներին հասարակության լայն զանգվածներիաջակցությունն ու փողոց դուրս գալը հետևանք էր երկրում արմատացած կոռուպցիայի, տնտեսական մենաշնորհների և դրանցով պայմանավորված անարդարության վառ դրսևորումների:
Շարժման հաջողված ավարտը պայմանավորված էր նաև այն հանգամանքով, որ նոր իրողությունում իշխանությունն ուժ չկիրառեց՝ շարժումը չարժանացավ 1996թ. և 2008թ. շարժումների ճակատագրին և իշխանափոխություննիրականացավ: Հայաստանում այլևս նոր իրողություն է, դրանից բխող դրական և բացասական հետևանքներով:
Այս իրավիճակի հանգուցալուծումն երկու կարևոր քայլ է ենթադրում՝ արտահերթ ընտրությունների անցկացում և հեղափոխությամբ ձևավորված նոր կառավարության ամբիցիոզ՝ արմատական բարեփոխումներ ենթադրող, ծրագրի առկայություն:
Թերևս առաջինը քաղաքական ուժերի կողմից գրեթե չի վիճարկվում, մինչդեռ նոր կառավարության ծրագիրը տարակուսանք է առաջացնում, որն ավելի շուտ հիշեցնում է ընտրություններին պատրաստվող քաղաքական ուժի նախընտրական խոստում և ոչ թե ծրագիր:
ՀԺԱՄ վարչություն
