Պայթյունից տուժածներն ապաքինվում են (տեսանյութ)
«Բուրգեր քինգ» արագ սննդի կետում ածխաթթու գազի 20 կգ-անոց բալոնի պայթյունից տուժողներից մեկը Ռուսաստանի քաղաքացի Լիզա Աբրահամովան է, որին տեղափոխել էին «Սուրբ Գրիգոր Լուսավորիչ» ԲԿ: Լիզա Աբրահամովան հիշում է. «Դուրս գալու պահին պայթյուն տեղի ունեցավ: Ես ընկա, իսկ իմ ընկերները հասցրին դուրս գալ»: Մոսկվայաբնակ աղջիկն իր դպրոցական ընկերների հետ որոշել էր գարնային արձակուրդներն այստեղ անցկացնել: Յարոսլավ Լյուբենկոն, որը նույնպես այս խմբի մեջ էր, բեկորային վնասվածք է ստացել: «Բեկորային վնասվածք է, կարել են: Հիմա լավ եմ զգում ինձ»: Ըստ «Սուրբ Գրիգոր Լուսավորիչ» ԲԿ-ի փոխտնօրեն Գագիկ Մանուկյանի, ռուս քաղաքացիները վաղն արդեն կլինեն Մոսկվայում, բուժանձնակազմն անձամբ նրանց կուղեկցի օդանավակայան: Հիվանդանոց տեղափոխվածներից երկուսը՝ Իրանի քաղաքացիներ Էրիկ Աշուղյանը եւ Զեյնա Հուսեինն արդեն դուրս են գրվել եւ մեկնել Հայաստանից: 8 տուժողներից ամենածանրը 8-ամյա Ռուբինա Մարկոսյանի վիճակն է, որն այս պահին շարունակում է գտնվել վերակենդանացման բաժանմունքում: «Ամբողջ գիշեր վիրահատվել է: Աջ կոնքի շրջանում պատռված վերք էր, որը կարվեց: Վիճակը առայժմ մնում է ծանր, բայց կարգավորվում է», ասում է Գագիկ Մանուկյանը: Ռուբինայի եղբայրը՝ 6 տարեկան Ռուդոլֆ Մարկոսյանը ունի զույգ սրունքների առաջնային մակերեսի քերծվածքներ եւ աջ հոնքի վրա մեկ կար է դրված: Վիճակը գնահատվում է բավարար: Քույրն ու եղբայրը, ինչպես նաեւ սննդի կետի մենեջեր Զարուհի Մելիքյանը դեռ կշարունակեն մնալ հիվանդանոցում: Կազմակերպությունն արդեն հոգացել է տուժածների բուժման ծախսերը: Հյուսիսային պողոտայում գտնվող «Բուրգեր քինգ» սննդի կետն առավոտյան փակ էր եւ կապարակնքված։ «Բուրգեր քինգ Արմենիա»-ի հասարակայնության հետ կապերի պատասխանատու Ինգա Հարությունյանը հայտնեց, որ վերանորոգումից հետո այն կվերաբացվի: Անդրադառնալով մեղավորներին՝ Ինգա Հարությունյանը նշեց, որ հստակ ոչինչ ասել չի կարող, չգիտեն ինչպես է տեղի ունեցել դեպքը: Տեղի ունեցածի առթիվ հարուցվել է քրեական գործ: Նախաքննությունը շարունակվում է:
