«Ապուշ պաշտոնյաներին հեռացնելու փոխարեն հայելին են կոտրում» (տեսանյութ)
Հայաստանը սահուն դառնում է ավտորիտար պետություն։ Երբ իրար հետեւից դռնփակ են դառնում տարբեր կառույցների աշխատանքը, փորձագետներին մնում է միայն այս գնահատականը հնչեցնել: «Ինչպես Խորհրդային միությունում էր: Կային մեկ, երկու իշխանական, իրենց ընտրած լրատվամիջոցները, որոնք լուսաբանվում էին ստանդարտ տեքստերով, տեքստերն էլ գրվում էին նախագահականում»,- ասում է քաղաքագետ Արմեն Բաղդասարյանը: Այս կերպ խոչնդոտվում է ոչ միայն լրագրողների ազատ աշխատանքը: Խախտվում է քաղաքացու՝ տեղեկատվություն ստանալու իրավունքը; «Իշխանությունները որոշել են ոչ թե ապուշ պաշտոնյաներին հեռացնել համակարգից, այլ ուղղակի թույլ չտալ շփման մեջ գտնվել նրանց հետ: Կոպիտ ասած իրենց դեմքը կարգավորելու փոխարեն հայելին փակել են, կոտրել են»,- ավելացնում է քաղաքագետը Խոսքի ազատության պաշտպանության կոմիտեի նախագահը ցավով է փաստում, երբ իշխանությունները չեն կարողանում լուծել քաղաքական, տնտեսական եւ այլ խնդիրներ, մեղքը գցում են լրատվամիջոցների վրա .»Փոխանակ իշխանությունները սեփական կեղտաջրերը մաքրեն, փոխանակ ցույց տան մամուլին, թե դրական ինչ -որ բան են ուզում անել, բայց որոշում են աշխատել նույն ոճով եւ սահմանափակումներ կիրառել մամուլի եւ լրատվամիջոցների դեմ: Ամեն ինչ ուղղված է մի խումբ անձանց իշխանությունը ամրապնդելուն»: Մարտի 23-ին Աժ-ն ընդունեց «Երևան քաղաքում տեղական ինքնակառավարման մասին» ՀՀ օրենքի փոփոխությունները, որոնց համաձայն էլ ավագանու նիստերի դահլիճ լրագրողների մուտքն արգելվեց; Նրանք ստիպված են էկրանից հետեւել զարգացումներին; «Հեռարձակման կոճակի վրա նստած է լինելու իրենց մարդը եւ բոլոր միջադեպերը որոնք տեղի կունենան ավագանու նիստերի դահլիճում, որեւէ կերպ չեն կարող լուսաբանվել: Բնականաբար այդ միջադեպերը տեսախցիկները չեն որսալու»,- ավելացնում է Երեւանի ավագանու «Ելք» խմբակցության անդամը: Ինֆորմացիայի ազատության կենտրոնը Երեւան քաղաքում տեղական ինքնակառավարման մասին» օրինագծի ընդունման հետ կապված դիմելու է ՄԻԵԴ, քանի որ յուրաքանչյուր սահմանափակում պետք է լինի պատճառաբանված: «Բնականաբար չկա սուր հասարակական պահանջ փակելու ավագանու նիստերը, հասարակական պահանջն է, որ ավագանու նիստերը լինել դռնբաց, այլ ոչ թե առցանց»,- նշում է կենտրոնի նախագահ Շուշան Դոյդոյանը: Հիշեցնենք, որ ավագանու նիստերը առանց լրագրողների անցկացնելու մասին խոսվեց փետրվարի 13-ին տեղի միջադեպից հետո, երբ «Երկիր Ծիրան»-ի խմբակցության անդամները Նուբարաշենի բաց կոյուղատարից ջուր էին բերել: Իսկ ՀՀԿ-ականները ծեծի ենթարկեցին «Երկիր Ծիրանի»-ի ավագանու անդամներին:
