«Մանչեսթեր Յունայթեդը» 10 հոգով հաղթեց «Արսենալին»
Ֆուտբոլի Անգլիայի Պրեմիեր լիգայի 15-րդ տուրի խաղում «Մանչեսթեր Յունայթեդը» Լոնդոնում 3:1 հաշվով վստահ հաղթեց տեղի «Արսենալին»: Հյուրերը շատ ակտիվ սկսեցին հանդիպումը եւ առաջին 11-րդ րոպեների ընթացքում երկու գոլ խփեցին: Աչքի ընկան Վալենսիան ու Լինգարդը: Ընդմիջումից չորս րոպե անց «Արսենալի» ֆուտբոլիստ Լյակազետը կրճատեց հաշվի տարբերությունը, սակայն 63-րդ րոպեին նույն Լինգարդը երկրորդ անգամ գրավեց տանտերերի դարպասը: Հանդիպման 74-րդ րոպեին «Մանչեսթեր Յունայթեդը» մնաց 10 հոգով, քանի որ կոպիտ խաղի համար դաշտից հեռացվեց Պոլ Պոգբան: «Արսենալը» երկրորդ խաղակեսում չնայած բացահայտ տարածքային առավելություն ուներ (79 տոկոս գնդակի տիրում), սակայն այդպես էլ չկարողացավ այն վերածել խփված գոլերի: Այդպիսով, «Մանչեսթեր Յունայթեդը» վաստակեց 35 միավոր եւ կրկին հաստատվեց 2-րդ հորիզոնականում, իսկ ահա «Արսենալը» 5-րդ պարտությունը կրեց առաջնությունում եւ 28 միավորով մնաց 5-րդ հորիզոնականում: Հիշեցնենք, որ «Մանչեսթեր Յունայթեդի» հայազգի ֆուտբոլիստ Հենրիխ Մխիթարյանը ընդհանրապես չէր հայտավորվել այս խաղին:
