«Պատգմավորները օրհներգը լսելիս ոտքի չեն կանգնում» (տեսանյութ)
«Քեզ համար, Հայաստան» երգը շատ լավ երգ է, բայց չի համապատասխանում օրհներգի. «Դա պետք է աղոթք լինի: Կարեւոր բան է, որ հասկանանք, որ մենք ձգտելու ենք դեպի լավը, լուսավորը, այլ ոչ թե կարեկցանք առաջացնի: Գովերգենք մեր երկիրը, մեզ լավ օրհներգ է պետք»,- այսօր լրագրողների հետ հանդիպման ժամանակ նշեց երաժիշտ Արտավազդ Բայաթյանը: Նրա խոսքերով՝ օրհներգն այնպիսին պետք է լինի, որ լսելուն պես բոլորը ոտքի կանգնեն եւ արտասանեն աղոթքի նման: «ԱԺ-ում նույնիսկ պատգմավորները օրհներգը լսելիս ոտքի չեն կանգնում: Պաշտոնյաները չեն էլ երգում, միշտ բերանները փակ է, բառերը նույնիսկ չգիտեն: Մեզ համա՞ր է օրհներգը»,- հարց է տալիս Արտավազդ Բայաթյանը: Հիշեցնենք, որ աշխարհահռչակ շանսոնյե Շառլ Ազնավուրը հայտարարել էր, թե ցանկանում է, որ «Քեզ համար, Հայաստան» երգը դառնա ՀՀ օրհներգը: Նկարիչ Հաղթանակ Շահումյանն էլ համոզված է՝ Շառլ Ազնավուրի մտահոգությունը կապված է նրա հետ, որ ներկայիս հիմնի վերաբերյալ իր կարծիքը բացասական է: «Հիմնը համախմբող, ոգեշնչող իմաստ պետք է ունենա: Մեր հիմնը արժանի չէ մեր ժողովրդին, դա փաստ է, մեր օգտագործվող հիմնը շատ թույլ է: Շառլի կարծիքը ստիպում է մտածել նոր օրհներգ ունենալու համար»,- ասաց նկարիչը: Հաղթանակ Շահումյանի խոսքերով՝ մեր պաշտոնյաները համարձակություն չունեն հիմնը փոխելու, մինչդեռ եւ օրհներգը եւ պետական զինանշանները պետք է փոխվեն եւ արժանի լինեն ժողովրդին. «Անհեթեթություն է, որ Շառլի երգը հիմն դառնա»: Բանախոսները կողմնակից են, որ « Հայաստան, երկիր դրախտավայր» երգը դառնա օրհներգ:
