Պերմյակովը Հայաստանում չի կարող կրել իր պատիժը
Ավետիսյան ընտանիքի 7 անդամների սպանության համար ցմահ ազատազրկման դատապարտված Վալերի Պերմյակովը չի կարող Հայաստանում կրել իր պատիժը, որովհետեւ հանձնված չէ Հայաստանին: «Դատական ակտը պետք է ճանաչվի Ռուսաստանի Դաշնության կողմից եւ տեղափոխման ակտ պետք է քննարկվի»,- «Ա1+»-ին ասաց Ավետիսյանների իրավահաջորդի ներկայացուցիչ Լուսինե Սահակյանը: Արդարադատության նախարարությունն արդեն քննարկում է Ռուսաստանի Դաշնության քաղաքացի, Գյումրիում Ավետիսյանների ընտանիքին սպանելու համար ցմահ ազատազրկման դատապարտված Վալերի Պերմյակովի պատժի կրման կազմակերպման հարցը: Վճռաբեկ դատարանը օրեր առաջ մերժել է Ավետիսյանների իրավահաջորդների ներկայացուցիչներ` Արթուր Սաքունցի, Արայիկ Զալյանի, Արգիշտի Կիվիրյանի վճռաբեկ բողոքները: Արթուր Սաքունցն ու Արայիկ Զալյանը պահանջում էին ամբողջությամբ բեկանել եւ փոփոխել Շիրակի մարզի ընդհանուր իրավասության դատարանի` Վալերի Պավելի Պերմյակովի նկատմամբ կայացրած դատավճիռը եւ գործն ուղարկել համապատասխան ստորադաս դատարան` նոր քննության: Արամազդ Կիվիրյանը նույնպես պահանջում էր բեկանել դատավճիռն ու գործն ուղարկել ստորադաս դատարան նոր քննության՝ տուժողների իրավահաջորդների հայցն ընդդեմ Ռուսաստանի Դաշնության` ոչ նյութական վնասի հատուցման պահանջի մասին քննելու համար: Վճռաբեկ դատարանը մերժել էր եւ առաջին ատյանի վճիռը մտել էր օրինական ուժի մեջ: Փաստաբան Լուսինե Սահակյանի համար ակնհայտ է եղել, որ Հայաստանի Հանրապետությունում հարցը նորմալ լուծում ստանալ չէր կարող. «Որովհետեւ ակնհայտ էր Հայաստանի կաշկանդվածությունը Ռուսաստանի Դաշնությունից: Ուղղակի ՀՀ ներպետական ատյանները իրենց մեջ ուժ չգտան, որպեսզի իրավական լուծում տան այդ խնդրին»: Վճիռը բողոքարկվելու է Սահմանադրական եւ Մարդու իրավունքների եվրոպական դատարան:
