Գյուղապետի միակ թեկնածուի օգտին 13 ձայն է եղել, դեմ՝ 35
Սյունիքի մարզի Վարդավանք համայնքի 74 ընտրողներից ընտրությանը մասնակցել է 49 ընտրող: Նրանցից 13-ը իրենց ձայնը տվել են միակ թեկնածու ՀՅԴ-ական, Վարդավանքի միջնակարգ դպրոցի գործադիր տնօրեն Համլետ Թորոսյանին: Ընտրողներից 35-ը դեմ է քվեարկել թեկնածուին: Հանրապետության վեց մարզերում՝ Արագածոտն, Արարատ, Արմավիր, Գեղարքունիք, Կոտայք, Շիրակ մարզերի թվով 10 համայնքներում ՏԻՄ ընտրություններ են: Համայնքներից 7-ում տեղի են ունեցել համայնքի ղեկավարի ընտրություններ, իսկ 3 համայնքում` ավագանու անդամի ընտրություններ: Համայնքների ղեկավարների արտահերթ ընտրություններ էին երկու գյուղերում՝ Շիրակի մարզի Արևիկ և Սյունիքի մարզի Վարդավանքում: Շիրակի մարզի Արեւիկ համայնքում էլ, ըստ նախնական արդյունքների, ընտրվել է ՀՀԿ-ական համայնքի ղեկավար Վարդգես Մելքոնյանը՝ ստանալով 526 քվե: Արմավիր Վարդանաշեն համայնքում էլ ընտրվել է միակ թեկնածուն՝ ՀՀԿ-ական Արթուր Մանուկյանը: Շիրակի մարզի Ախուրիկ համայնքում էլ ՀՀԿ-ական համայնքի ղեկավար Վարդիթեր Գասպարյանը պարտվել է անկուսակցական, ինքնառաջադրված Հովհաննես Պողոսյանին: Վերջինս ստացել է 277 քվե, իսկ համայնքի ղեկավարը՝ 262: Մյուս համայնքներում գործող գյուղապետերը վերընտրվել են:
