«Պարոն Բագրատյան ջան, դուք դեռ վարչապետ չեք դարձել» (տեսանյութ)
ԱԺ արտահերթ նիստին այսօր «ԱԺ կանոնակարգ» օրենքում փոփոխություններ կատարելու մասին նախագծի քննարկմանը մինչ կսկսեր իր ելույթը ՀԱԿ խմբակցության անդամ Հրանտ Բագրատյանը նախ խիստ տոնով կոչ արեց լռություն պահպանել դահլիճում: «Պարոն Բագրատյան ջան, դուք դեռ վարչապետ չեք դարձել»,- փորձեց կատակել ԱԺ փոխխոսնակ Էդուարդ Շարմազանովը: «Հանգստացեք, կդառնամ. վախենամ՝ այլ ելք չունենաք այլեւս»,- արձագանքեց Հրանտ Բագրատյանը: Ըստ նրա՝ ԱԺ է բերվել հին կանոնակարգ, քանի որ ներկայացված փոփոխությունները կոսմետիկ են. «Դարձրեք պատգամավորին կենսունակ, սա է պառլամենտական կառավարումը: Մի հատ մոնիթորինգ արեք, պարոն Սահակյան, որքան ժամանակ եմ, օրինակ, ես կորցնում իմ պատգամավորական գործունեության վրա: Ես կարծում եմ՝ քիչ, ու ես ինձ վատ պատգամավոր եմ համարում: Այստեղ պետք է արտադրվեն օրենքներ. ԱԺ-ն ավելի կարեւոր հաստատություն է, քան կառավարությունը»: Պարոն Բագրատյանը դեմ է, որ կրճատվել է պատգամավորի ելույթի տեւողությունը. «ԱԺ հիմքը, անկյունաքարը, այս շենքի քարը պատգամավորն է, թողեք նա խոսա, ինչո՞ւ եք նրա ելույթը 10 րոպեից 5 րոպե սարքել: Էներգիան թողեք թող այստեղ հանի»:
