Ղազախստանի նախագահի թոռը քննադատել է երկրի ֆուտբոլի ֆեդերացիային
Ղազախստանի նախագահ Նուրսուլթան Նազարբաեւի թոռը՝ Այսուլթան Նազարբաեւը, մտահոգված է ղազախական ֆուտբոլի գործերով: Բանն այն է, որ նա հանդես է եկել անգլիական «Պորտսմութ» եւ «Չելսի» ակումբների պատանեկան թիմերում, իսկ հայրենիք վերադառնալուց հետո խաղացել է «Աստանայի» փոխարինողների կազմում: «Ես համբերատար սպասում եմ Ղազախստանի ֆուտբոլի ֆեդերացիայի նախագահի ընտրություններին, ինչպես ընդունված է կանոնակարգով, սակայն նկատելով, որ ֆեդերացիան առանց կշռադատելու շարունակում է ակտիվություն ցուցաբերել, որոշել եմ ներկայացնել իմ տեսակետը: Այդ մարդիկ ամենօրյա եւ երկարատեւ ծրագրեր են ընդունում, որոնք, ցավոք, օգուտ չեն տալիս ոչ ղազախական ֆուտբոլին, ոչ էլ մեր երկրին: Իմ նպատակն է կատարել երկրի նախագահի հանձնարարությունը եւ իրագործել նոր ծրագիրը», - հայտարարել է երկրի նախագահի 26-ամյա թոռը: Ըստ Այսուլթան Նազարբաեւի, ֆուտբոլային ակումբները սխալ են ծախսում պետության կողմից տրամադրված գումարները: Նրա կարծիքով դրանք պետք է օգտագործվեն միմիայն մանկապատանեկան ֆուտբոլի եւ ակումբների ենթակառուցվածքների զարգացման համար:
