«Բանանցը» հաղթեց «Արարատին» գավաթի առաջին խաղում
Այսօր մեկնարկեց 2017 թվականի ֆուտբոլի Հայաստանի գավաթի խաղարկությունը: Քառորդ եզրափակիչ փուլի առաջին խաղում հանրապետության չեմպիոն Երեւանի «Ալաշկերտը» սեփական դաշտում 1:2 հաշվով պարտվեց «Փյունիկին»: Գործող գավաթակիր Երեւանի «Բանանցը» հաղթանակով սկսեց տիտղոսի պաշտպանությունը: Տիտո Ռամալյոյի սաները հյուրընկալվելիս 2:1 հաշվով առավելության հասան Երեւանի «Արարատի» ֆուտբոլիստների նկատմամբ: Ինչպես տեղեկացնում է Հայաստանի ֆուտբոլի ֆեդերացիայի մամուլի ծառայությունը, այսօր նախատեսված «Գանձասար-Կապան» - «Էրեբունի» հանդիպումը հետաձգվել է, քանի որ այդ խաղը սպասարկող մրցավարական խումբն առավոտյան ավտովթարի է ենթարկվել Երեւան – Կապան ճանապարհին: Ավտոմեքենայում գտնվող բոլոր երեք խաղավարներն էլ տեղափոխվել են Գորիսի քաղաքային հիվանդանոց: Նրանց կյանքին վտանգ չի սպառնում: Քառորդ եզրափակիչ փուլի չորրորդ հանդիպումը տեղի կունենա վաղը, սեպտեմբերի 22-ին: Առաջին խմբում հանդես եկող Աբովյանի «Կոտայքը» սեփական դաշտում կընդունի Գյումրիի «Շիրակին»:
