Ապօրինի հարստացումը կքրեականացվի (տեսանյութ)
Վարչապետ Հովիկ Աբրահամյանն այսօր հանձնարարական տվեց Կենտրոնական բանկին՝ ավիատոմսերի ձեռքբերման նպատակով վարկային քարտային հաշիվներով շրջանառվող միջոցների չափաքանակները կրճատելու համար. «Ես կարծում եմ 30 տոկոս պետք է կրճատենք, կրճատեք նոր կգրեք, պայմանավորվեցինք»,- կառավարության նիստի ժամանակ ասաց նա ԿԲ նախագահ Ատոմ Ջանջուղազյանին: Կոռուպցիայի դեմ պայքարի խորհրդում տրված հանձնարարականների կատարման ընթացքն այսօրվա նիստի ժամանակ ներկայացրեց արդարադատության նախարարը: Որոշվել է ապօրինի հարստացումը քրեականացնելու նպատակով օրենսդրական նոր փաթեթ ներկայացնել: «Մենք առաջարկում ենք, որ այն դեպքում, երբ պաշտոնատար անձի մոտ արձանագրվել է ունեցվածքի զգալի աճ եւ այն անհամադրելի է իր եկամուտի հետ, ապա նա պարտավոր է հիմնավորել այդ անհամամասնությունը: Հիմնավորելու դեպքում խնդիր չկա, չհիմնավորելու դեպքում՝ վրա կհասնի պարտավորությունը»,- նշեց Արփինե Հովհաննիսյանը: Կառավարության որոշմամբ՝ կփոփոխվի նաեւ «Մաքսային կարգավորումների մասին» օրենքը: Մինչեւ 200 եվրոյին համարժեք, թե ներմուծումները, թե արտահանումները , եթե իրականացվում են մեկ փոխադրողի կողմից, չեն պահանջի ոչ բրոկերային ծառայություն, ոչ մաքսավճարի պարտավորություն: Վարչապետի կարծիքով որոշումը էականորեն կթեթեւացնի ներմուծողների ու արտահանողների բեռը, ուստի հանձնարարեց հարցը ավելի արագ ուղարկել խորհրդարան: