Ա. Հովհաննիսյանն առանցքային փոփոխություններ է խոստանում (տեսանյութ)
Գործադիրն այսօր հաստատեց Քաղաքացիական դատավարության օրենսգրքի նախագիծը, Դատական օրենսգրքում փոփոխություններ ու լրացումներ կատարելու հարցն ու հարակից օրենքների նախագծերը: Արդարադատության նախարար Արփինե Հովհաննիսյանն ասաց, որ այս նախագծերով առանցքային փոփոխություններ են կատարվելու դատական համակարգում: Մասնավորապես, նախատեսվում է նվազեցնել դատարանների ծանրաբեռնվածությունը և կոռուպցիոն ռիսկերը: Փոփոխությունները հիմնավորվում են նրանով, որ 1999 թվականին ուժի մեջ մտած ՀՀ գործող Քաղաքացիական դատավարության օրենսգիրքը թեև ընդունման պահին բավական առաջադիմական էր, սակայն զերծ չէր նաև թերություններից, որոնց մի մասը առկա էին օրենսգրքի ընդունման պահին, իսկ մյուսներն ի հայտ եկան դրա գործնական կիրառման ընթացքում: «Ավելին, ՀՀ Սահմանադրության 2015 թվականի դեկտեմբերի 6-ին տեղի ունեցած փոփոխությունները ևս անհրաժեշտություն են առաջացնում Քաղաքացիական դատավարության օրենսգրքում համապատասխան իրավակարգավորումներում փոփոխություններ և լրացումներ կատարել»,- նշեց Արփինե Հովհաննիսյանը: Նախարարը հավելեց նաեւ, որ գործող Քաղաքացիական դատավարության օրենսգիրքը իրավական տեխնիկայի տեսանկյունից չի համապատասխանում «Իրավական ակտերի մասին» օրենքի պահանջներին, քանի որ վերջինս ընդունվել է ավելի ուշ:
