«Գրանադայի» ֆուտբոլիստները ֆինանսական խթան են սպասում «Ռեալից»
Իսպանական «Գրանադա» թիմի դարպասապահ Իվան Կելավան խոստովանել է, որ իր խաղընկերները դրամական պարգեւատրում են սպասում Մադրիդի «Ռեալից», որպեսզի մարտականորեն տրամադրվեն «Բարսելոնայի» հետ խաղին եւ պայքարեն միավորների համար: Բանն այն է, որ Իսպանիայի առաջնության ավարտից մեկ տուր առաջ «Բարսելոնային» ու «Ռեալին» բաժանում է ընդամենը մեկ միավոր: Եթե կատալոնյան ակումբը վերջին տուրի խաղում չկարողանա հաղթել «Գրանադային», ապա արքայական ակումբը «Դեպորտիվոյին» հաղթելու դեպքում կնվաճի չեմպիոնի կոչումը: «Մենք վերջին օրերին թիմով նշել ենք Պրիմերայում մեր տեղը պահպանելու առիթը, ուստի ինչ-որ չափով կորցրել ենք մարզավիճակը: Սակայն խաղընկերներս հայտարարել են, որ «Բարսելոնայի» հետ լուրջ պայքար կմղեն միայն «Ռեալից» ֆինանսական խթան ստանալու դեպքում», - ասել է «Գրանադայի» խորվաթ դարպասապահը: Հարկ է նշել, որ «Ռեալ» ֆուտբոլային ակումբի ղեկավարությունն առայժմ ոչ մի հայտարարություն չի կատարել այս կապակցությամբ:
