Հարություն Քուշկյանն ազատվել է պաշտոնից
ԼՂՀ Առողջապահության նախարար Հարություն Քուշկյանն իր սեփական դիմումի համաձայն այսօր ազատվել է պաշտոնից: Հարություն Քուշքյանի մամուլի խոսնակ Շուշան Հունանյանը հաստատեց այս լուրը՝ նշելով, որ «այն, ինչ որ իր առջեւ դրված էր՝ արեց, վերջացրեց»: «Ստեփանակերտի հիվանդանոցում իր սեփական միջոցներով գնել է այն սարքը, որի միջոցով ստենդ են դնում մարդու անոթների մեջ: Այդ ծառայությունն արդեն մեկ տարի ու կես է աշխատում է, եւ լավ է աշխատում, լավ հիմքերի վրա է դրված: Արտոնությունները շատ բարձր են: ԼՂՀ շրջաններում բացվել են նոր հիվանդանոցներ, ծննդօգնությունը դարձել է անվճար եւ մի շարք բարեփոխումներ են տեղի ունեցել»,- «Ա1+»-ին ասաց Շուշան Հունանյանը: Մամուլի խոսնակը միաժամանակ տեղեկացրեց, որ այս երկու տարիների ընթացքում նախարարը ապրել է ընտանիքից կտրված՝ «Արմենիա» հյուրանոցում: