«Տիգրան Ուրիխանյանն ու Նիկոլ Փաշինյանը ոչ մրցակցային, ոչ էլ հակազդեցության դաշտում են»
Լավ հասկանում եմ, որ քաղաքական դաշտում այսօր ձևավորվում են երկու ազդեցիկ, շատ որոշակի կողմնակիցների աջակցությունը ու վստահությունը վայելող քաղաքական ընդդիմադիր ուժեր, այն է` «Քաղաքացիական պայմանագիրը» և «Քաղաքացիական շտաբը»: Պարզից էլ պարզ է, որ իշխանության կամ այլ շահագրգիռ ճամբարում այսօր մեկ օրակարգ կա` հակազդեցություն կամ գոնե մրցակցություն առաջացնել այս երկու ուժերի միջև: Այսօրվա թերթերից մեկում հայտնված և որոշ կայքերի թեթև ձեռքով տարածված իբր հրապարակումը հենց այս խոսքերիս առիթը դարձավ: Թեման մեկ և ընդմիշտ փակելու համար պաշտոնապես հայտարարում եմ` «Քաղաքացիական շտաբի» նախաձեռնող խումբը և Տիգրան Ուրիխանյանը անձամբ բարձր են գնահատում ինչպես Նիկոլ Փաշինյանի, այնպես էլ «Քաղաքացիական պայմանագրի» մյուս անդամների գործունեությունը, նրանց պայքարը հանուն երկրում առկա պրոբլեմների լուծման և հայաստանցու շահերի պաշտպանության: Մենք գտնում ենք, որ «Քաղաքացիական պայմանագիրը» կարևորագույն գործառույթ ունի երկրում և իրականացնելու է քաղաքական սերնդափոխության արդիական պահանջը: Մենք չենք տեսնում մեզ ո՛չ մրցակցային, ո՛չ էլ առավել ևս հակազդեցության դաշտում: «Քաղաքացիական շտաբի» մամուլի խոսնակ` Վարդան Քոչարյան