ԱՊՊԱ-ն վնասն ամբողջությամբ չի փոխհատուցում. քաղաքացիները դժգոհ են (տեսանյութ)
Ճանապարհատրանսպորտային պատահարից հետո ապահովագրական գործակալության տրամադրած գումարը չի բավականացրել Նաիրի Ասրյանին մեքենայի վերանորոգման համար։ «Մեքենային խփեցին, այս ֆառը ջարդվեց, ԱՊՊԱ-ն մենակ մի հատ ֆառ է տալիս։ Իմ ավտոն խփվեց՝ կռիլոն, կապոտը, աբլիցովկեն, շիթը վնասվեց։ Ընդամենը 200,000 դրամ փող էր տալիս։ 200,000 դրամով 130.000 դրամ տվել եմ մենակ երկու հատ ֆառ եմ արել։ Ինչու պետք է պարտադրեն մեզ, չեմ ուզում չեմ անում։ Ես կտանեմ իմ ավտոն էլ կսարքեմ, դիմացինինս էլ»,- ասում է Նաիրի Ասրյանը։ Ավտոտրանսպորտային միջոցների օգտագործումից բխող պատասխանատվության պարտադիր ապահովագրությունից՝ ԱՊՊԱ-ի ինստիտուտից ոչ բոլոր վարորդներն են գոհ։ Նրանք նշում են, որ ոչ միայն վնասն են քիչ գնահատում, այլ նաեւ գումարը ուշացումով են տալիս։ Մայրաքաղաքում եւ մարզկենտրոններում ԱՊՊԱ գործակալը վթարի վայր պետք է մոտենա 35, իսկ այլ վայրերում՝ 80 րոպեի ընթացքում։ Սակայն մեր իրականությունում քիչ չեն դեպքերը, երբ ԱՊՊԱ գործակալի ժամանումը վթարի վայր ուշանում է։ Ի դեպ, ԱՊՊԱ ընդհանուր կանոնն է` հատուցվում են ավտովթարի հետեւանքով տուժողին պատճառված անձնական եւ գույքային վնասները: Ըստ օրենքի՝ անհրաժեշտ է առանց ուշացումների եւ ապահովագրական պայմանագրում սահմանված կարգով կատարել ապահովագրական վճարումները։ Մանրամասները՝ տեսանյութում
