Մեդալներ են բերել Բելառուսից
Հայաստանի ակրոբատները 3 մեդալ են նվաճել Բելառուսի Վիտեբսկ քաղաքում կայացած «Տիեզերագնացների գավաթի» խաղարկությունում: Այդ մասին տեղեկացնում է ՀՀ սպորտի եւ երիտասարդության հարցերի նախարարության մամուլի ծառայությունը:
Մրցաշարին մասնակցել են Հայաստանի, Ռուսաստանի, Բելառուսի, Ուկրաինայի, Մոլդովայի եւ Մերձդնեստրյան հանրապետության ակրոբատները:
Աղջիկների եռյակ ձեւում Հայաստանից հանդես են եկել Գայանե Քոչարյանը, Հասմիկ Սիմոնյանը եւ Քրիստինե Շիմալյանը, խառը զույգերում` Արմեն Սիմոնյանը եւ Գոհար Կարապետյանը, աղջիկների զույգերում` Գոհար Գրիգորյանը եւ Անահիտ Գինոսյանը:
Աղջիկների եռյակը մրցել է 11-16 տարեկան տարիքային խմբում, իսկ զույգերը` մեծահասակների խմբում` սպորտի վարպետի ծրագրով: Մեր մարզիկներն իրենց ձեւերում գրավել են 2-րդ տեղը եւ արժանացել արծաթե մեդալների:
