Այսօր` Հայաստան - Իսպանիա
Շախմատի Հայաստանի տղամարդկանց հավաքականին լուրջ մրցակից է սպասում օլիմպիադայի երրորդ տուրում` հանձինս Իսպանիայի ընտրանու:
Վարջինիս, իհարկե, չի կարելի համեմատել երկրի ֆուտբոլային հավաքականի հետ, որը աշխարհի եւ Եվրոպայի գործող չեմպիոնն է, սակայն իր կազմով շատ քիչ է զիջում առաջատարներին: Իսպանացիները առաջին տուրում հաղթել են Լիբանանին` 3,5:0,5, իսկ երկրորդում առավելության են հասել Բելառուսի նկատմամբ` 2,5:1,5:
Հայաստանի հավաքականը այսօր հանդես կգա Լեւոն Արոնյան, Սերգեյ Մովսեսյան, Գաբրիել Սարգսյան, Տիգրան Լ. Պետրոսյան կազմով: Այս անգամ կհանգստանա Վլադիմիր Հակոբյանը, որն առաջին երկու տուրերում տարել է նույնքան հաղթանակ:
Իսպանիայի հավաքականը գլխավորում է Ֆրանցիսկո Վալյեխոն: Նրան հաջորդում են Իվան Սալգադոն, Միգել Իլյեսկան եւ Օլեգ Կորնեեւը, որոնք իրենց վարկանիշով շատ քիչ են զիջում մեր շախմատիստներին:
Հայաստանի կանանց հավաքականը այսօր կմրցի Հնդկաստանի ուժեղ ընտրանու հետ: Մեր թիմը հանդես կգա իր հիմնական կազմով` Էլինա Դանիելյան, Լիլիթ Մկրտչյան, Լիլիթ Գալոյան, Մարիա Կուրսովա:
