Հայաստան - Կանադա` 3:1
Ֆուտբոլի Հայաստանի հավաքականը այսօր ընկերական խաղում 3:1 հաշվով կամային հաղթանակ տարավ Կանադայի ազգային թիմի նկատմամբ:
Կիպրոսի Լիմասոլ քաղաքում կայացած խաղում հաշիվը բացեց կանադացիների ավագ Քեւին ՄաքԿենան, որը 5-րդ րոպեին անկյունայինի խաղարկումից հետո գլխի դիպուկ հարվածով գրավեց դարպասի վերին անկյունը:
23-րդ րոպեին աչքի ընկավ Հայաստանի հավաքականի բրազիլացի կիսապաշտպան Մարկոսը, որը ստանալով գնդակը, շատ արագ ազատվեց իրեն հսկող պաշտպանից եւ հուժկու հարվածով վերականգնեց հավասարակշռությունը:
Երկրորդ խաղակեսը լիովին անցավ մեր ֆուտբոլիստների առավելությամբ: 69-րդ րոպեին մերոնք անկյունային խաղարկեցին, Արթուր Եդիգարյանի հուժկու հարվածից հետո գնդակը ետ մղեց հորիզոնական դարպասաձողը, բայց ահա Մարկոսի հարվածից հետո կանադացիները անզոր գտնվեց:
Հանդիպման վերջին րոպեին Արթուր Սարկիսովը 11 մ հարված վաստակեց, որը վստահ իրացրեց մեր հավաքականում իր անդրանիկ խաղը անցկացնող Արազ Օզբիլիսը:
Այդպիսով, Կիպրոսում կայացած ընկերական երկու խաղերում Հայաստանի հավաքականը մեկ հաղթանակ տարավ, իսկ մեկում պարտություն կրեց (0:2` Սերբիայի թիմից):
