Եվրո-2012-ը բացել է դռները
Երեկ իր դռներն է բացել ֆուտբոլի 2012 թվականի Եվրոպայի առաջնության վերջին` 8-րդ մարզադաշտը: Դա Վարշավայում կառուցված «Ազգային ստադիոնն է», որը կարող է տեղավորել 58.000 հանդիսական:
Երեկ կայացած բացման արարողությանը մասնակցել են Լեհաստանի ռոք խմբերը, իսկ ֆուտբոլիստները մարզադաշտի բացումը կանեն փետրվարի 11-ին, երբ Լեհաստանի սուպերգավաթի եզրափակիչ խաղում կհանդիպեն Վարշավայի «Լեգիան» եւ Կրակովի «Վիսլան»:
Իսկ ահա Ուկրաինայում շարունակվում է 49 նոր հյուրանոցների շինարարությունը, որոնք առաջնության ժամանակ կընդունեն մասնակից երկրների ֆուտբոլասերներին:
Եվրո-2012-ին արդեն սկսել են պատրաստվել մրցավարները, որոնք իտալացի նախկին մրցավար, հանրահայտ Պիեռլուիջի Կոլինայի գլխավորությամբ այժմ ուսումնամարզական հավաք են անցկացնում թուրքական Անթալիայում:
Ուշագրավ որոշում է ընդունել Գերմանիայի ֆուտբոլի միությունը: Եվրոպայի առաջնության ժամանակ ազգային հավաքականի մարզիչներին եւ ֆուտբոլիստներին կտրամադրվի հեծանիվներ: Նրանք այդ հեծանիվներով պետք է գնան գերմանացի լրագրողների հետ կայանալիք մամուլի ասուլիսներին:
Ի դեպ, Գերմանիայի հավաքականը առաջնության օրերին հանգրվանելու է լեհական Գդանսկ քաղաքում, սակայն իր հանդիպումներն անցկացնելու է Ուկրաինայի Լվով եւ Խարկով քաղաքներում: Բունդեսթիմն այդ խաղերին արդեն կմեկնի տրամադրված հատուկ օդանավով:
