Արոնյանը հաղթեց Անանդին
Տղամարդկանց շախմատի «Մեծ Սաղավարտի» 4-րդ խաղարկության եզրափակիչ մրցաշարում հաջող մեկնարկից հետո, Լեւոն Արոնյանը 9-րդ տուրում կրկին հայտնվեց ուշադրության կենտրոնում:
Բիլբաոյում ընթացող ստուգատեսի նախավերջին տուրում Արոնյանը նորույթ կիրառեց եւ գեղեցիկ ոճով, 25-րդ քայլում համոզիչ առավելությամբ պարտության մատնեց աշխարհի չեմպիոն Անանդին:
Կառլսենն էլ իր հերթին սպիտակներով 34-րդ քայլում հաղթեց առաջատարին` Իվունչուկին ու վաստակած միավորներով հավասարվեց վերջինիս:
Այս տուրում հաղթական միավոր գրանցեց նաեւ իսպանացի Վալեխոն, որը կարողացավ առավելության հասնել ամերիկացի Նակամուրայի նկատմամբ:
Տուրն ընդհանրապես հաջող էր սպիտակ ֆիգուրներով խաղացող շախմատիստների համար՝ 3 պարտիայում էլ նրանք հաջողության հասան:
Ավարտական տուրից առաջ, մրցաշարում երկիշխանություն է՝ 14-ական միավորով առաջատարները Կառլսենն ու Իվանչուկն են: 11-ական միավորով Արոնյանն ու Նակամուրան կիսում են 3-4-րդ տեղերը: մրցաշարային աղյուսակը եզրափակում է Անանդը՝ 9 միավորով:
Այսօր եզրափակիչ 10-րդ տուրում կկայանան Իվանչուկ-Արոնյան, Անանդ-Վալեխո, Նակամուրա-Կառլսեն պարտիաները:
