Ժամանակը գնաց, եթե Դանիել Իոաննիսյանը հեռացնի այդ գրառումը, վարչական դատարան չենք դիմի (տեսանյութ)
Աջակցիր «Ա1+»-ինՀայաստանի Կենտրոնական ընտրական հանձնաժողովը դե ֆակտո ընդունել է, որ «Լուսավոր Հայաստան» կուսակցության նկատմամբ խախտում է թույլ տրվել, սակայն մերժել է «Իրազեկ քաղաքացիների միավորում» կազմակերպությանը դիտորդական մանդատից զրկելու պահանջը։ Այս մասին այսօր՝ մայիսի 30-ին, ԿԸՀ նիստի ավարտից հետո հայտարարել է «Լուսավոր Հայաստան» կուսակցության առաջնորդ Էդմոն Մարուքյանը։
Նրա խոսքով՝ ԿԸՀ-ն կարող էր նույնիսկ սահմանափակվել Դանիել Իոաննիսյանին հավատարմագրումից զրկելով, սակայն դա էլ չի արել։
Միևնույն ժամանակ, ինչպես նշել է Մարուքյանը, հանձնաժողովը որոշում է կայացրել պարտավորեցնել անկախ դիտորդական դաշինքին, որի կազմում ընդգրկված է Իոաննիսյանը, հեռացնել անձամբ իրեն վերաբերող հրապարակումներն ու հայտարարությունները։
Մարուքյանը հիշեցրել է, որ խոսքը վերաբերում է մի տեսանյութի և հրապարակման, որոնք արդեն տարածվել ու տեղադրվել են տարբեր հարթակներում, ինչն էլ ավելի է դժվարացնում խախտված իրավունքների վերականգնումը։
«Փաստացի ԿԸՀ-ն ընդունեց, որ մեր նկատմամբ խախտում եղել է»,- հայտարարել է նա՝ հավելելով, որ հանձնաժողովը դիտորդական մանդատից զրկելու պահանջը չափազանց խիստ է համարել։
«Եթե չհեռացնեն, մենք կշարունակենք գործել. բողոքարկման համար ունենք երեք օր, իսկ ԿԸՀ-ն պետք է հետևի մեր իրավունքների վերականգնմանը»,- նշել է Մարուքյանը։
