ՀԱՕԿ-ը քիքբոքսինգի ֆեդերցիա չի ճանաչում
Քիքբոքսինգի համաշխարհային ասոցիացիայի փոխնախագահ Էսպեն Լունդը նամակով դիմել է Հայաստանի ազգային օլիմպիական կոմիտեին` խնդրելով պատասխանել, թե. ՀՀ-ում գործող քիքբոքսինգի երկու ֆեդերացիաներից որի՞ն է ճանաչում` Գառնիկ Հայրապետյանի, թե՞ Հրայր Կարապետյանի ղեկավարած կազմակերպությունը: Այս մասին տեղեկացնում է ՀԱՕԿ-ի պաշտոնական կայքէջը:
Բանն այն է, որ հոկտեմբերի 24-28-ը Մակեդոնիայում կայանալիք՝ քիքբոքսինգի աշխարհի հերթական առաջնությանը Հայաստանից հայտ են ներկայացրել երկու ֆեդերացիաներ:
ՀԱՕԿ-ը պաշտոնապես հայտարարել է, որ հայաստանյան քիքբոքսինգի երկու կազմակերպություններից ոչ մեկին չի ճանաչում, քանի որ Հայաստանը չկա համաշխարհային ասոցիացիայի անդամագրված երկրների ցանկում:
Հիշեցնենք, որ անցած ապրիլին Հայաստանի սպորտի եւ երիտասարդության հարցերի նախարարությունը եւ Հայաստանի քիքբոքսինգի ազգային ֆեդերացիան համատեղ կազմակերպել էին Հայաստանի քիքբոքսինգի առաջնություն, որին մասնակցել են 32 ակումբ, 220 մարզիկ: Տեղեկացնենք, որ ՀՔԱՖ-ի նախագահը Գառնիկ Հայրապետյանն է:
