Ռաֆիկ Մանուկյանը լավագույնն է աշխարհում
Հունահռոմեական ոճի ըմբշամարտի Հայաստանի երիտասարդական հավաքականը Բուխարեստում մեկնարկած աշխարհի առաջնության մրցումների առաջին օրը երկու մեդալ նվաճեց:
74 կգ քաշային կարգում Ռաֆիկ Մանուկյանը, հաղթելով իր բոլոր մրցակիցներին,դարձավ աշխարհի երիտասարդների չեմպիոն: Եզրափակիչ մարտում մեր ըմբիշը լարված պայքարում հաղթեց վրացի Զուրաբ Դաթունաշվիլուն՝ 0:2, 3:0, 4:2:
50 կգ քաշային Ռուդիկ Մկրտչյանը առաջին մարտում պարտվեց ադրբեջանացի մրցակցին: Վերջինս մտավ եզրափակիչ, ուստի մեր ըմբիշն իրավունք ստացավ մասնակցելու սփոփիչ մրցաշարին: Ռուդիկ Մկրտչյանը երկու հաղթանակ տարավ եւ բրոնզե մեդալ նվաճեց:
60 կգ քաշային կարգում մեր ներկայացուցիչ Ասլան Պողոսյանը 1/8 եզրափակիչում զիջեց մրցակցին, բայց նույնպես մասնակցեց սփոփման մրցաշարին: Սակայն .նա 2-րդ մարտում պարտվեց եւ դուրս մնաց մեդալի համար պայքարից:
96 կգ քաշային Արթուր Ալեքսանյանը 1/8 եզրափակիչում զիջեց թուրք մրցակցին եւ ժամանակից շուտ ավարտեց ելույթը:
Այսօր մրցասպարեզ կմտնեն 55 կգ քաշային Նարեկ Խաչատրյանը, 66 կգ քաշային Հայկ Արշակյանը, 84 կգ քաշային Գեւորգ Մանուկյանը եւ 120 կգ քաշային Վաչիկ Եղիազարյանը:
