«Միկան» մեկնեց Նորվեգիա
Ֆուտբոլի Հայաստանի այս տարվա գավաթակիր Երեւանի «Միկան» վաղը Եվրոպայի լիգայի որակավորման 2-րդ փուլի շրջանակում ուժերը կչափի նորվեգական «Վոլերենգա» թիմի հետ:
Այսօր առավոտյան «Միկան» Երեւան - Մոսկվա - Օսլո չվերթով մեկնել է մրցավայր: Ինչպես «Ա1+»-ի մարզական լրագրողին տեղեկացրին ակումբի մամուլի կենտրոնից, թիմի գլխավոր մարզիչ Էդուարդ Մարգարովը խաղին պատրաստվելու համար ընդգրկել է ուղիղ 18 ֆուտբոլիստ, այնքան, որքան պահանջվում է հանդիպման արձանագրությունը լրացնելու համար:
Օսլոյում «Միկային» չեն կարող օգնել թիմի նորեկ, իսպանացի Ադայ Բենիտեսը, որը վնասվածք է ստացել մարզման ժամանակ, ինչպես նաեւ Վահագն Մինասյանը, Գրիգոր Մկրտչյանը եւ Անդրանիկ Շահգելդյանը: Իսկ ահա Հայաստանի առաջնության խաղին վնասվածք ստացած չինացի հարձակվող Դոնգ Ֆանժուն արդեն վերականգնվել է եւ թիմի հետ մեկնել է Նորվեգիա:
Նշենք, որ «Վոլերենգա» - «Միկա» հանդիպումը սկսվելու է Երեւանի ժամանակով 22։00-ին։ Բուքմեյքերները խաղի բացահայտ ֆավորիտ են համարում նորվեգական թիմին, որի հաղթանակը գնահատվում է 1,20 գործակիցով, իսկ «Միկայինը»` 12,00-ով:
«Միկայի» կազմը.
Դարպասապահներ` Գեւորգ Կասպարով, Ֆելիքս Հակոբյան:
Պաշտպաններ` Հրայր Մկոյան, Ալեքսանդր Թադեւոսյան, Աղվան Մկրտչյան, Գեւորգ Պողոսյան, Հայկ Իշխանյան, Անդրանիկ Ոսկանյան, Հովհաննես Գրիգորյան, Ալեքս:
Կիսապաշտպաններ` Արմեն Պետրոսյան, Էդնեյ, Պեդրո Լոպես, Կոնստանտին Մանդրիչենկո, Արեգ Ազատյան:
Հարձակվողներ` Նարեկ Բեգլարյան, Սեմյոն Մուրադյան, Դոնգ Ֆանժու:
