«Գանձասարը» երկմտանքի մեջ է
Ինչպես արդեն նշել ենք, Հայաստանի ֆուտբոլի ֆեդերացիայի կարգապահական կոմիտեի որոշմամբ Կապանի «Գանձասարը» բարձրագույն խմբի առաջիկա 5 տնային հանդիպումները անցկացնելու է առանց հանդիսատեսների:
Ինչպես նշեց «Ա1+»-ի մարզական թղթակցին «Գանձասարի» գործադիր տնօրեն Վլադիկ Առաքելյանը, այդ լուրը պարզապես անակնկալի է բերել ակումբի ղեկավարությանը:
«Ակումբի հովանավորները եւ ղեկավարությունը պատրաստվում են հատուկ ժողով կազմակերպել այդ հարցի կապակցությամբ եւ որոշել հետագա անելիքները: Կարող եմ միայն ասել, որ թիմը չի մեկնել Երեւան, որպեսզի անմիջապես պատրաստվի մայիսի 22-ին նախատեսված «Շիրակի» հետ արտագնա խաղին»:
Մեր այն հարցին, արդյոք հնարավոր է «Գանձասարը» հրաժարվի ՀՀ առաջնությանը մասնակցելուց, Վլադիկ Առաքելյանը ասաց. «Ակումբի ղեկավարությունը բողոքարկել է ՀՖՖ կարգապահական եւ մրցավարական կոմիտեների կայացրած որոշումները: Այժմ մենք սպասում ենք ֆեդերացիայի պատասխանին»:
«Գանձասարի» գործադիր տնօրենը վերջում տեղեկացրեց, որ թիմն այժմ հանգրվանել է Կապանի հյուրանոցում եւ պատրաստվում է առաջիկա հանդիպմանը, սակայն խաղին մեկնել-չմեկնելու հարցը կորոշվի վաղը երեկոյան, երբ ինչ-որ չափով պարզ կդառնա ՀՖՖ-ի ղեկավարության դիրքորոշումն այդ հարցում:
