Եզրափակիչ խաղի ֆավորիտը «Պորտոն» է
Այսօր Իռլանդիայի մայրաքաղաք Դուբլինում կայանալիք ֆուտբոլի Եվրոպայի լիգայի եզրափակիչ հանդիպումը առանձնապես մեծ ուշադրության չի արժանացել բրիտանական եւ իռլանդական լրատվամիջոցների կողմից: Պատճառը ոչ թե այն է, որ եզրափակիչում հանդիպելու են պորտուգալական երկու թիմեր` «Պորտոն» ու «Բրագան», այլ այն, որ Անգլիայի թագուհի Եղիսաբեթ 2-րդը առաջին անգամ այցելել է հարեւան Իռլանդիա:
Ի դեպ, իռլանդացիները շատ հանգամանալից են պատրաստվել այդ խաղին: Մասնավորապես` հանդիպման կազմակերպիչները նոր հեռուստատեխնիկայի ձեռք բերման համար ծախսել են 75 մլն եվրո: Խաղը անմիջապես մարզադաշտից լուսաբանելու են 52 երկրների հեռուստառադիոընկերություններ:
Եզրափակիչի ընդգծված ֆավորիտ համարվում է «Պորտոն», որը տարբեր մրցաշարերում «Բրագայի» հետ անցկացրած 131 հանդիպումներից 92-ում հաղթանակ է տարել, 22-ն ոչ-ոքի է ավարտել, եւ միայն 17-ում պարտություն կրել: Այս մրցաշրջանում թիմերի միջեւ տեղի ունեցած երկու խաղերում էլ հաղթել է «Պորտոն»` 2:0, 3:2: Ըստ բուքմեյքերների` վերջինիս հաղթելու հնարավորությունը հավասար է 80 տոկոսի:
Ի դեպ, «Պորտոն» 10-րդ անգամ հանդես կգա միջազգային մրցաշարի եզրափակիչում: Նախկին 9-ը խաղերից 6-ում հաղթել են «դրակոնները», ընդ որում 3 դեպքում դա նրանց հաջողվել է 11 մ հարվածաշարի օգնությամբ: «Բրագան» առաջին անգամ է անմիջապես պայքարելու եվրոպական գավաթի համար:
Հանդիպումը կսպասարկի Իսպանիայի մրցավարական խումբը` 40-ամյա Կառլոս Վելասկո Կարբայոյի գլխավորությամբ: Այդպիսով, Եվրոպայի լիգայի եզրափակիչը մաքուր պիրենեյան կլինի:
