«Նոան» հաղթեց «Արարատ-Արմենիային» և շրջանցեց նրան. ՀՀ ֆուտբոլի Պրեմիեր Լիգա (տեսանյութ)

Հայաստանի ֆուտբոլի IDBank Պրեմիեր Լիգայում այսօր կայացան 16-րդ տուրի երկու հանդիպումներ:

Նախ Չարենցավանի «Վանը» սեփական դաշտում ընդունեց «Վեսթ Արմենիային»: Մրցաշարի ետնապահը 4:1 հաշվով ջախջախեց առաջնության նորեկին: «Վանն» այդ հաղթանակից հետո վաստակեց 10 միավոր և հավասարվեց հենց 9-րդ տեղում գտնվող «Վեսթ Արմենիային»:

Օրվա երկրորդ խաղում միմյանց հետ մրցեցին չեմպիոնության համար պայքար մղող «Նոան» ու «Արարատ-Արմենիան»: Աբովյանում կայացած հանդիպումն ավարտվեց տանտերերի նվազագույն հաղթանակով՝ 1:0: «Նոան» վաստակեց 33 միավոր և բարձրացավ 2-րդ հորիզոնական: «Արարատ-Արմենիան» երեք հաղթանակից հետո պարտություն կրեց և այժմ 32 միավորով զբաղեցնում է 3-րդ հորիզոնականը:

Վաղը կկայանան տուրի մնացած երկու խաղերը: Գործող չեմպիոն «Ուրարտուն» սեփական դաշտում կընդունի «Ալաշկերտին», իսկ Գյումրիի «Շիրակը»՝ Երևանի «Արարատին»: